KRALENDIJK – Bario di Nort’i Saliña ta organisá selebrashon di e fiestanan di San Juan i San Pedro, organisá pa Fundashon Nawati huntu ku Plataforma di Bario. Kontrario na e añanan anterior Gobièrnu di Boneiru pa medio di su Sekshon di Kultura, Arte i Literatura e aña akí no ta tuma parti den e selebrashonnan den bario ku sosten finansiero.

E selebrashonnan na Nort’i Saliña ta tuma lugá na e parke Red, Gold & Green dilanti di Mentor. Selebrashon di e dos fiestanan kultural akí ta pa sigui konservá un tradishon di nos pueblo i pa pasa esakinan pa e generashon nobo, di manera ku ta sigui mantené e manifestashonnan kultural akí den nos bario i na Boneiru. Fundashon Nawati i Plataforma di Bario ta orguyoso ku e selebrashonnan akí tin bon akohida serka públiko i tokadónan di nos bario. Pa e aña akí atrobe nos ta invitá e tokadónan ku kantantenan di bario i tambe e públiko ku gusta e selebrashon ku e bulamentu di kandela pa ta presente na e sitio for di 20:00 or pa e selebrashon riba 23 i 28 di yüni. Lo tin músika ku kanto, bulamentu di kandela i tambe e tradishonal betu pa tokadó.

Fundashon Nawati ta hasi un yamada na e bario i na e amantenan di San Juan i San Pedro pa reservá e nochinan di djamars 23 i djadumingu 28 di yüni, ku ta bispu di e dianan di e dos Santunan, pa e selebrashonnan. Nan ta un bunita aspekto di nos kultura ku nos mester mantené ku orguyo patriótiko. Pa personanan ku ke buska mas informashon tokante San Juan i San Pedro por subi riba e sait di FuHiKuBo pa wak e dokumental di San Juan i San Pedro den e programanan di Herensia.

Share This
error: Content is protected !!