KRALENDIJK – Gerold Bernabela di sinidkato FEDEBON ta pidi pa Gobièrnu di Boneiru ta mas enbolbí den e problema di BOPEC. “Gobièrnu di Boneiru mester ta mas serka di e problema na BOPEC. Bèrdat ta trata di un kompania privá, sinembargo ta hopi famia ta bai pèrdè trabou. Porloménos 300 persona ya a pèrdè trabou, esaki por multiplik’é ku 3, i bo mes por saka e resultado. Gran parti di e hendenan ku a pèrdè trabou a bandoná Boneiru. Nos tin ku hasi posibel pa mantené kupo di trabou. Esaki solamente nos por hasié den union. Pa e motibu aki sindikatonan a uni. Ku esaki FEDEBON ta konsiderá ku a hasi tur esfuerso pa garantisá ku BOPEC tin futuro. Si kontinuá ku aktividat na BOPEC, nos sa ku no ta tur tanki ta bai den servisio. Debí ku no ta tur tanki ta bai den servisio, ta bai tin kantidat di trabou disponibel pa hopi hende. Loke si mester tene kuenta ta ku na momentu ku a kantidat di trabou baha, meskos esnan ku ta traha por bira ménos.

Nos ta den un situashon kaminda mester bai bati na porta di Hulanda. 45 aña a basha tur tipo di kos den e asuntu aki. Pa deshasí di tur loke tin na e lugá, lo kosta enormemente hopi sèn. Gobièrnu di Boneiru no tin sèn pa hasi e trabou. Si ta Hulanda ta bai hasié, mihó e inbertí den e instalashonnan. Den e direkshon aki nos mester bai, òf Hulanda mester bisa e no ta interesá mas pa BOPEC ta na Boneiru. Hulanda tin tur kos pa por yuda. No bin pa eliminá BOPEC, sino pa drecha kos pa kontinuashon. Nos no por keda bisa nos ta parti di Hulanda i momentu ku nan tin ku yuda nos, ta bisa aki si nan no ta atendé. Mester pone forsa huntu pa logra keda eksistí. No ta eksistí diferente sindikato. Uni nos ta bai pa e lucha. 2 luna mas tin sèn i despues no tin nada mas pa BOPEC. No tin idea kiko e notario ta bai hasi. Si e laba nan saka su kurpa afó, no tin nada pa e trahadó. Ya a kuminsá saka sesantia pa trahadónan. Pues si nos mes ta prepará pa esei, ta nifiká ku kos ta bai kaba,”Bernabela a bisa.    

Share This
error: Content is protected !!