KRALENDIJK – Norwin Nochi Willem di USIBO a konta loke nan a papia ku SZW. “Nos a hasi tur esfuerso pa haña mas informashon posibel. Nos a aserka SZW i puntra nan kiko nos komo sindikato tin ku hasi, esaki pasobra nos no ta tende e doño di trabou hasi e petishon. Kontesta di SZW tabata ku Hulanda i su ministerio a tene kuenta ku BOPEC ta bai sera. SZW a kuminsá hasi preparashon. Den nan mira loke tur hende ku nos a papia kuné, ta mira ku BOPEC ta bai sobrebibí. Esei no tei. E ta duru pa bisa, sinembargo e sèn no ta bai yega Boneiru. Pues por primintí kuantu kos ku nan ke, sinembargo si e sèn no yega Boneiru, no por paga trahadó, no por mantené e terminal habri. SZW a kuminsá prepará, hasi nan kalkulashon, si akaso e kos yega asina leu. Gobièrnu di OLB tin su preparashonnan hasi, si e lugá sera, kon nan lo por duna un yudansa pa esnan ku pèrdè trabou. Laga nos no pensa riba esei i ban lucha pa BOPEC keda habri. E sesantia ta legal, sinembargo den esei tambe nos tin duda. Ta un situashon hopi delikado i fastioso. Kisas e ministerio sa kos ku nos no sa, i nan a kuminsá prepará pa e loke ta bini,” Nochi Willem a bisa.  

Share This
error: Content is protected !!