KRALENDIJK – Lionel Soliano, kende ta e persona ku ta na kabes di e proseso di èksamen pa pasamentu di reibeweis a papia ku Radio Live 99.9 FM.

Den kuadro di e medidanan di prevenshon di COVID-19, for di 17 di mart no tabata posibel pa personanan ku ke saka reibeweis hasi esaki. Ofisina di reibeweis a stòp di duna èksamen. A kanselá e èksamennan pasobra na e ofisina no por a garantisá distansia sosial di 1,5 meter entre e hende ku tin ku saka reibeweis i esun ku ta enkargá ku e èksamen. “Entrante 6 di yüli ta inisiá i kontinuá ku èksamen pa yega na reibeweis B, C, D i E. 13 di yüli ta kontinuá ku èksamen di reibeweis teorétiko. E plan ta pa hasi esaki den un sentro di bario, kaminda tin mas espasio pa pone mas hende na mes momentu, asina aselerá e retraso teniendo kuenta ku e asuntu di distansia sosial. Personanan ku ke inskribí pa pasa èksamen di teoria i práktika pa reibeweis, por hasi esei entrante 3 di ougùstùs. Pa por pasa e èksamennan akí, un hende mester ta registrá na Asuntu Sivil.

Ta bon pa menshoná ku no tin un lista di hende ku prioridat. Tur hende ta pasa èksamen segun e fecha ku nan a inskribí. Solamente si un kai afó, un otro ta bai na su lugá. Pues ofisina di reibeweis no ta traha ku lista di preferensia òf urgensia pa hende ku ke pasa èksamen. Pa e ofisina tur hende tin derecho riba trato igual.

Tin regla pa hende ku a saka nan reibeweis na Boneiru i awor ke bai biba na Hulanda i kambia nan reibeweis pa unu hulandes. Na Hulanda lei ta stipulá denter di kuantu dia esaki ta posibel. Pa por kambia e reibeweis di Boneiru na Hulanda, un hende mester tabatin aloménos 185 dia (6 luna) bibá na Boneiru despues ku el a saka e reibeweis na Boneiru. Esaki ta reglá den artíkulo 44 insiso 2b di e asina yamá ‘Reglement Rijbewijzen’ di Hulanda.

Tin kasi 500 hende ku ta pendiente pa pasa èksamen pa haña reibeweis. E proseso pa pasa reibeweis, ta hasi esaki ku protokòl, loke ta informá kada persona momentu ku nan ta na turno pa pasa èksamen,” Soliano a bisa.

Share This
error: Content is protected !!