Kralendijk – E barku krusero Caribbean Princess ta hasiendo un asina yamá ‘Live Saving Equipment Test’ na parti nort di Klein Bonaire. Esaki ta un tèst pa wak si tur ekipo ta funshoná bon si mester evakuá hende si surgi un kalamidat. E tèst a kuminsá 10’or di mainta i ta dura te 4’or di atardi. Despues di esei e barku ta bandoná Boneiru, i bai Kòrsou bèk,” asina kapitan di haf Gunther Flanegin a splika na Radio Live 99.9 FM.

E barku kier a hasi e tèst promé den laman enfrente di aeropuerto BIA. Pero esei no tabata posibel, ya ku e lo a keda drif riba laman nèt den e zona ku ta riba ruta di avionnan ku tin di baha na aeropuerto BIA.” Flanegin a tuma kontakto ku BIA pa wak si tabata posibel pa e barku hasi e tèst na e lugá ku nan tabata ke.

Pero mirando e kantidat di buelo ku tin awe planiá pa yega BIA, no tabata posibel pa e barku hasi e tèst na e sitio ku nan tabata ke. A duna kapitan di e barku opshon pa tèst parti nort di Klein Bonaire i nan a bai di akuerdo ku esei. Caribbean Princess lo keda drif na un distansia di un mia for di kosta di Klein Bonaire.”

E barku a yega Boneiru awe djaweps mainta trempan di sorpresa. Su presensia a lanta basta pregunta ya ku debí na COVID-19 te novèmber niun barku krusero no ta bini Boneiru. Agensia di e barku a hasi petishon pa e tèst den bahia di Kralendijk, pero no tabatin palabrashon di fecha i orario. Tripulashon di un barku krusero ta obligá pa tèst sigun leinan internashonal kada 6 luna kon pa aktua na momento ku mester evakuá pasahero i wak si tur ekipo pa hasi esaki ta funshoná” segun kapitan di haf Gunther Flanegin.

Share This
error: Content is protected !!