KRALENDIJK – Diferente persona a tuma kontakto ku notisia Live99 awe djaweps mainta pa informá di un barku di turista ku lo ta aserkando Boneiru.
Notisia Live99 mesora a buska kontakto pa haña sa kiko ta pasando. Pa kuminsa Boneiru su portanan ta será i no ta risibí barku krusero.

Di informashon ku nos ta disponé di dje ta indiká ku e barku Caribbean Princess a yega den bahia di Boneiru ku intenshon pa hasi un ‘Life Savings Equipment Test’, un tèst ku tin ku hasi kada 6 luna sigun lei internashonal pa wak si tur kos ta funshoná abordo, pero nan no tabatin pèrmit pa hasi esaki awe den bahia di Kralendijk. Segun Havenmeester Gunther Flannegin: ”Enberdat a hasi un petishon via agensia di e barku pa e tèst den bahia di Kralendijk komo ku nos laman no ta brutu, pero no tabatin orario ni fecha stipulá”. E kapitan di barku a haña òrdu pa drif sigi bai. Despues a duna kapitan di barku e opshon pa hasi e tèst pa nort di Klein Bonaire i esaki ta tumando lugá te ku 4or di atardi. Tambe t’asina ku abordo di e barku ta solamente e ‘crew’ ku ta dirigí e barku ta ariba, pues nan no ta transportando turista.

Boneiru por ta trankil paso no tin niun barku di turista riba ‘schedule’ pa mara na nos wafnan por lo pronto. Asta t’asina ku ta te ku promé di novèmber 2020 kompania nan krusero lo tuma desishon ku nan lo kuminsá nabegá ku turista.

FUENTE: AIMED AYUBI.

FOTO KORTESIA: TIO PEPE

NOTISIA KU BO POR KONFIA.

Share This
error: Content is protected !!