KRALENDIJK – Djasabra ultimo tabatin entrega di premio di e torneonan dediká na Jaedan Crestian i Emanuel Lont i alabes a sorpresá e dos hungadornan lokual nan mes a eksperenshá. E hungadonan di e torneonan a haña invitashon di sr Serapio Pop pa tabata presente na Between 2 Buns.

Esnan ku a kai den premio di e torneo dediká na Jaedan tabata:

1. Emanuel Lont

2. Ralph Salimin

3. Jaedan Crestian

Jaedan a remarká ku maske e tabatin dos aña inaktivo, el a aseptá e reto pa partisipá den e torneo i e a gana di entre otro su maestro!

Den e torneo dediká na Emanuel Lont tabata Frederic Simonis ku a gana tur su weganan, pues invikto.

1. Fredric Simonis

2. Ralph Salimin

3. Emanuel Lont

Despues di e entrega di premio a yama e dos hobennan aki dilanti pa risibi un rekuerdo di BJSC, un Boneiru ku nan portrèt hinka den dje. Un bunita trabou di sr Maximi Chirino.

Despues di esaki tabata famia Lont ku a sorpresá e presentenan ku un trofeo rotativo pa laga e torneo dedika na Emanuel sirbi pa un estímulo pa sr Pop i e hobennan pa sigi partisipá. Frederic Simonis a tuma e torneo komo e prome ganado. Esun ku gané tres biaha mas keda ku e trofeo.

Tantu Jaedan i Emanuel a partisipá mas ku djes aña den e klup hubenil di ahedres i ta gradisido di lokual nan a siña i na mener Pop i awor ta en buska di un klup na Hulanda pa por sigi desaroya nan nivel di ahedres na Hulanda kaminda nan ta bai studia. Tambe nan ta spera ku e hobennan lo djoin pa siña e wega ku ta yudabo den pensa i planea i sigur den pensa pa materianan komo matematika i den bo estudio general.

E premionan di klup a ser entregá pa miembro di direktiva sra Rudsela Coffie.

Nos ta desea Jaedan Crestian i Emanuel Lont hopi eksito den futuro ku nan estudio i tambe den e deporte di ahedres i nan ta semper bonbiní.

Share This
error: Content is protected !!