KRALENDIJK – Despues ku Selibon N.V. a risibí diferente bon reakshon relashoná ku e trabounan di limpiesa riba Kaya Korona, e kompania ta lansa un kampaña di limpiesa den bario. E kampaña ta titulá “Ta nos bario: limpi i bunita”. Meta di e kampaña ta pa konsientisá e habitante pa tene su bario limpi.

Djaweps atardi na Parke Den Stashi, diferente persona di Selibon N.V. i diputadonan a papia tokante e proyekto ariba menshoná. Rudsel Leito, direktor di Selibon N.V. a papia den presensia di tur presente, i a bisa ku a haña petishon pa wak kon por hasi pa hasi limpiesa den bario.

“A yega na un struktura pa hasi limpiesa. Promé tabata kaya korona i awor ta turno pa bario Den Stashi ku ta na turno. Djaluna awor ta kuminsá. E problema grandi ta e asuntu di outo bieu ku hendenan tin den kura di kas i no ke deshasí di esaki. Hende ta mantené esaki, loke nan a stima i no ke pèrdè na kos. Sinembargo den lei ta para ku no por mantené outo bieu den kura di kas. Ta bai hasi e bario limpi i tin un plan pa mantené e barionan limpi,” tabata entre otro loke Leitu a menshoná.

Despues a papia diputado James Kroon.
Nos komo gobièrnu ta aki pa huntu nos bai hasi Boneiru limpi. Gobièrnu ta duna tur aporte pa kontinuá ku e plan. Hasi  limpi i mantené limpi, loke ta duna un bon bista pa e isla, diputado Kroon a menshoná.

Diputado Nina den Heyer kende a menshoná ku limpiesa ta importante, loke ta yuda kontribuí pa nos ta bon di salu. “Esaki ta krea bon ambiente pa e muchanan, den un área limpi pa nan desaroyo. Bario di Antriol mester bira ehèmpel pa otro barionan. “Mi ta gradisí Selibon N.V. pa e proyekto aki i ku nan a duna oportunidat na hendenan ku difikultat pa un trabou, “diputado den Heyer a bisa.  


Seguidamente a papia diputado Elvis Tjin Asjoe. “Mi ta kontentu loke mi a tende di e proyekto. For di chikitu mi ta kòrda kon a kuminsá plama e informashon pa no tira shushi abou i e kos ei a penetrá di mi. Ta bon pe bario ta limpi. E turista no ke kana kantu di laman so, òf den solo. Nan ke ta den bario i banda di kas di e suidadano. Esaki ta otro motibu ku ta importante pa tene e bario limpi. Mi ta gradisí Selibon N.V.  pa loke nan ta hasiendo,”diputado Tjin Asjoe a bisa. Despues a papia algun persona mas kendenan a menshoná tokante e proyekto pa hasi barionan limpi. Pa mas informashon por bishita página di Facebook di Selibon N.V.

Share This
error: Content is protected !!