KRALENDIJK – Narciso Franciso Janga mihó konosi komo “Siso” a bai nos dilanti.

Mi konosé “Siso” for di tempu mi tabata mucha chikitu. Mi ta papia di tempu mi tabata tin 6 pa 8 aña. Mi sa di loke mi mama a kontami, ku ami i rumannan a nase i lanta sèmper serka di e famia. Sigur mi ta kòrda komo mucha di 8 i 9 aña, mi tabata hopi na kas di Helena i “Siso” . Mi tabata hopi sera ku nan yu mas chikitu Joselito (Arthur). Sèmper nos di bario Sabana a yam’é “Pinki” òf Kókórokóis.  Mi a drumi lanta na diferente okashon na kas di “Siso” i Helena. Mi mama nan tabata plania pa bai Kòrsou fakansi i nan tabata puntrami kiko mi ta deseá i mi tabata bisanan, mi ta bai kasi di Helena. Pues mi tabata preferá na nan kas i no bai keiru den avion. Tur e yunan sèmper mi a atendé ku nan manera ruman. Apesar ku “Pinki” ta mas serka di mi edat, e otronan ta hende alegre i sosial ku amor pa tur hende.  Tempu a pasa nos tur a krese i mi no tabata bai hopi mas na kas di e famia. Sinembargo hendenan ku bo lanta kuné promé ku bo pasa 20 aña, ta hendenan ku ta haña un lugá spesial den bo kurason. Mi tabata i ta gusta kome apeldam. Na kas di “Siso” tabatin un palu grandi di apeldam patras di kas, i hopi aña mi tabata kome apeldam for di e palu. No ami so, sinembargo otro  amigu nan di bario tambe. Mi sa ku ami tabata gusta mas tantu ku nan tur. Te dia di awe mi gusta kome apeldam, i unda mi pasa si tin un palu karga ku e fruta, mi ta kome nan. 

“Siso” ta kore outo?

Sèmper mi a lanta i konosé “Siso” un koredó di truk’i  shushi manera ta bisa. E palabra korekto ta trùk ku ta transportá sushi. “Anyway”, mi ta kòrda tempu “Siso” a baha ku penshun el a kuminsá kore outo i bus. Kasi mi no por a komprondé loke mi tabata mira. Sèmper mi a kere ta trùk so e por kore i no outo ku ta hopi mas chikitu. E ta parse prèt sinembargo asina ma eksperensi’é. Algu a sosodé kuné riba kaminda di bai Rincon, i el a konfrontá problema ku un di su wowonan. Algu simpel a sosodé, kaminda e tabata manehá un bus chikitu, i algu a bai den su wowo, ku a kost’é un di su wowonan.  “Siso” a kontinuá ku bida, gosando di su penshun huntu ku su famia. Tremendo persona trankil sin molestiá niun hende. Sèmper ku rèspèt p’ami. E ta yamami Edsón, ku énfasis riba e son.  Asina mi konosé sèmper. Edat ta subi i e kurpanan ta kuminsá bira krekeché manera ta bisa. Fin di siman tras di lomba mi a puntra e 2 yunan ku mi ta topa ku mas frekuensia, kon ta ku “Siso”. Nan a bisami e ta sigui mihó, sinembargo mi por a nota ku “Siso” ta den lucha fuerte pa kontinuá ku bida. Djamars mainta 23 di yüni, mi a tende e tristu notisia ku “Siso” a fayesé. Forsa na henter famia. Mi sa ku boso sèmper a stima boso tata, kende a lanta boso tur bon. Boso no a stima ku palabra, sino ku man na obra. Nunka boso tabata falta algu na kas. Esei mi sa pasobra mi a pasa hopi tempu drumi lanta i kome na boso kas. Dios duna forsa na famia i yena e lugá bashí di ku e pèrdida. Riba potrèt “Siso” i su esposa Helena.           

Share This
error: Content is protected !!