Kralendijk – Manera ta konosí, na Hulanda, Kòrsou i Aruba pa añanan kaba tin diskushonnan ta tuma lugá rondo di e tradishonal fiesta di mucha Sanikolas i su ayudantenan. Ku zwarte pit ta rasista i ta deskriminá e hende di kolo. Awor mas ku nunka e tópiko aki ta keda unu delikado, mirando desaroyonan rondo di diskriminashon mundialmente.

Na hulanda promé minister Mark Rutte despues di tur e diskushon i protestanan ku tin di ‘Black Lives Matter’, a haña un petishon pa eliminá zwarte pit.

Na Kòrsou e organisadónan a duna di konosé ku nan no ta organisá e yegada di Sanikolas e aña aki, mirando ku maske kuantu adaptashon a hasi, e fiesta ta keda relashoná ku rasismo. Semper a konsiderá e fiesta aki un fiesta pa trese alegria serka muchanan, un temporada pa premia nos muchanan su bon komportashon. Hamas tabata e intenshon pa niun hende sinti nan mes deskriminá ku e fiesta aki e organisadónan a trese dilanti den un komunikado. E hecho ku e fiesta aki ta keda relashoná ku rasismo ta pone ku e ta pèrdè su sabor i hopi hende tin asta miedu di selebrá esaki pa nan no wòrdu konsiderá komo hende rasista.

Na Aruba, Minister Xiomara Maduro a bisa ku kontrali na Kòrsou, e hòmber Santu lo yega Aruba e aña aki, pero e diferensia ta ku e lo yega den un forma diferente. Mester wak kon ta hasi ku e aglomerashon di hende relashoná ku e krisis di COVID-19. Esei ta hasi e yegada un reto, pero no ta asina ku ta kanselá e yegada, manera ku a hasi na Kòrsou. Segun minister Maduro, loke ta bai ta diferente e aña aki, ta e ‘look’ di e pitnan. Esaki pa evitá mas problema di kontroversia rondo di e asuntu di e.o. rasismo. Pues pitnan lo ta di kolo e biaha aki i no pretu.

Na Boneiru ainda tin reunionnan ku tin ku tuma lugá. Diputado Nina den Heyer a bisa ku mester papia ku diferente grupo i despues di esaki lo tuma un desishon pa tur hende sa den ki direkshon ke bai ku henter e fiesta aki. Komishon Sanikolas ku ta asistente di e hòmber Santu aki na Boneiru, a duna di konosé ku nan ta kla pa eventualmente organisá e yegada pero ainda ta muchu prematuro pa disidí si Sanikolas lo bini Boneiru e aña aki. Pa lokual ta e asuntu di COVID-19 i aglomerashon di hende, tin diferente aktividat grandi ku tin ku tuma desishon riba dje promé ku yega luna di novèmber ku ta e luna ku Sanikolas i su pitnan ta yega Boneiru. Entre otro dia di Boneiru, Regatta i otronan. Tokante e diskushon di rasismo e komishon lo no mete ku esaki i ta keda for di prensa te ora por tuma un desishon.

Share This
error: Content is protected !!