KRALENDIJK – Trahadónan di BonLab a manda un karta pa prensa pa ekspresá nan mal kontentu relashoná ku situashon na BonLab i nan elogio pa Ben Oleana. Den e karta tin skirbi: ”Suskritonan, trahadónan di BonLab ke pone lo siguiente na konosementu di diputado Elvis Tjin Asjoe i pueblo di Boneiru.

Den pasado un grupo di trahadó di BonLab a yega di bai kaba serka eks direktornan di BHM, pa mustra riba e mal maneho i abusunan ku e direktor di BonLab, Reginald ‘Yonchi’ Dortalina ta kometiendo ku nan. E eks direktornan di BHM aki no tabatin e kurashi di a mishi ku e direktor di Bonlab, Yonchi Dortalina, sea ta pa motibu nan polítiko òf pa miedu. Nos no sa. 

Awor ku a haña un Ben Oleana, un hòmber íntegro, i ku e kurashi pa aktua kontra e bagamunderia ku pa años ta tumando lugá, diputado Elvis Tjin Asjoe ta kore defendé su eks kompinchi di partido UPB bon amigu sin buska drechi kiko ta pasando realmente na Bonlab. A ni e desensia diputado Tjin Asjoe no tabatin di laga mira ni sikiera su punta di Elvis nanishi na Bonlab durante e 4 lunanan ku a pasa, pa wak kiko ta pasando en realidat na Bonlab i ku e trahadónan di Bonlab.

Diputado Tjin Asjoe a bisa na radio ku 4 luna a pasa i ainda e investigashon kontra e direktor no ta kla i no por hasi asina aki ku hende.

Diputado sa ku nos tin mas ku 2 biaha 4 aña ta soportá abusu serka e direktor? Esey si por? Fui diputado!

Kon diputado ta kere ku un investigashon di entre otro deroche di plaka pa mas ku 10 aña por keda kla den 4 luna?.

Danki Ben di a skucha nos i aktua! Sino awe Bonlab no tabata eksistí.

Nos tin gana di sa ku ora diputado Tjin Asjoe haña i mira e resultado di e investigashon, si e ta duna honor na su mes i retirá komo diputado di Overheids NV nan i tuma Ben Oleana bèk na BHM pa e kaba ku su trabou ku el a kuminsá kune.

Ben, danki un biaha mas! Boneiru mester di mínimo 10 Ben Oleana mas pa por kaba ku e bagamunderia di mandatarionan sin eskrupolo ku tei pa defendé solamente nan mes i nan kompinchinan.

Pa no pasa ku nos loke a pasa ku Ben, tene nos nòmbernan pa boso so!

Share This
error: Content is protected !!