KRALENDIJK – Diputado Elvis Tjin Asjoe no ta strobando ningun investigashon. Esaki e direktor di BonLab Reginald Yonchi Dortalina a trese dilanti rekshonando riba un karta ku supuesto trahadónan di BonLab a manda pa prensa. N’e momentunan aki e ta riba non-aktif debí na un investigashon ku ta tumando lugá kontra su persona na BonLab. Dortalina: ”M’a tuma nota di un komunikado ku algun supuesto trahadó di Bonlab a publiká akusando ami i diputado Tjin-a-Sjoe di yen di kos mahos. Manera ya ta bisto, polítika ta hungando su wega. Ta trata na provokami pa bisa algu mientras ku ta bon konosí, ku mi tin prohibishon pa papia (spreekverbod) tokante Bonlab. Lo yega e dia ku lo mi aklará tur kos. Por lo pronto mi ta apstené mi mes di papia tokante di Bonlab i ta warda ku tur pasenshi di mundu e resultado di e investigashon ku ta tumando lugá.

”Loke sí mi por papia di dje ta di e polítika sushi ku ta tumando lugá. Ta usando hende pa hunga polítika sushi kontra diputado Elvis Tjin-a-Sjoe. Ta bèrdat ku nos a lanta huntu den Antriol i ku nos ta amigu. Mi no por nenga esei. Ta bèrdat tambe ku mi tin kasi 4 luna sin papia ku Tjin Asjoe. Asta mi por bisa ku mi ta hopi rabiá kuné mes, pa motibu ku e ni sikiera a reakshoná riba un inhustisia ku a keda kometé kontra mi persona. E no ta kontestá mi yamadanan ni mi appnan”, Dortalina ta bisa.

Segun Dortalina, Tjin Asjoe sèmper a bisa ku e ta distansiá su mes for di tur loke ku ta pinta di ta favoritismo pa su persona, pa nan no tild’é di kier yud’é òf defendé. Nèt loke e no tabata ke, ta pasa kuné aworaki. Esaki ta inhustu.

”Mi kier aklará esaki pa e polítikonan ku ta tira piedra skonde man i ku ta hasi uso di hende pa logra defamá e diputado. Pues no ta bèrdat ku Elvis Tjin Asjoe ta strobando ningun investigashon. No ta bèrdat ku e ta defendiendo mi. E ni sikiera a papia kumi den e ultimo 4 lunanan.

”Den tur loke nos hasi, nos mester kòrda di ta sèmper sinsero i hustu. No kalumniá hende inhustamente. No lanta falsu testimonio kontra bo próhimo. No usa mi nòmber pa daña nòmber di otro.
Si bo ta inosente bo no tin mester di ningun hende pa defendé bo. Anto si mester defendé mi polítikamente, lo mi por hasi esaki mihó ku Elvis.

Share This
error: Content is protected !!