KRALENDIJK – Djadumingu anochi algu promé ku 9’or, notifikashon a drenta na warda di polis ku un aksidente a kaba tuma lugá riba kaya Nikiboko sùit na altura di ofisina di abogado Anthony Nicolaas.

Na yegada di e promé patruya a konstatá ku tabatin un bròmer i 2 persona bentá abou riba kaminda. Ta trata di un hende hòmber i un hende muhé. Mesora a manda pidi 2 ambulans na e sitio pa atendé e dos personanan heridá.

Investigashon preliminar ku outoridatnan a hasi na e sitio a resultá ku e 2 personanan riba bròmer tabata kore riba kaya Nikiboko sùit direkshon Playa. Dado momentu un buriku a krusa kaminda inesperdamente nan dilanti. E choke tabata inevitabel. Despues di a dal den e buriku, e shofùr a pèrdè kòntròl i tur dos a resultá riba kaminda. E buriku na kareda a sigi su rumbo.

Shofùr i pasahero di e bròmer, tur dos tabata keha di doló na diferente parti di nan kurpa i ku ambulans a transportá nan pa hòspital pa tratamentu médiko mas avansá.

Kombinashon di potrèt ta ilustrá senario di e aksidente i sushi di buriku ku a keda tras ku ta un indikashon ku enbèrdat e choke tabata kontra e bestia.

Share This
error: Content is protected !!