KRALENDIJK – Djasabra último anochi a tuma lugá entrega di diploma pa enfermeranan di Fundashon Mariadal-Academy (FM). Ta trata di studiantenan di ziekenverzorgende nivel 3, verpleegkundige nivel 4 i Dialyse verpleegkundig. Durante e anochi direktor di Fundashon Mariadal dr. Giovanni Frans a dirigí palabra.

“Ront mundu ta notabel kon importante ta un tarea di un zùster, awor mas ku nunka ku e problema di Covid-19. Boso semper lo keda kòrda esaki. Mi ta orguyoso ku e logro aki, i ta sigur ku boso tambe ta super orguyoso di boso mes. Den kuido semper tin kambio. No solamente na Boneiru, tur parti di mundu konstantemente tin kambio den kuido. Esaki ta komienso pa kontinuashon. No haña mas ku 5 yu, pa asina tin tempu, energia pa e funshon komo enfermera. E tarea komo zùster mester ta den bo, sino boso lo no a yega aki. Éksito pa futuro, ”tabata entre otro loke Frans a menshoná.

Seguidamente a papia yùfrou Shirley Jibodh. “Boso ta kla awor pa yuda un enfermo. No tin eksepshon entre un pober òf un riku. Tur hende ta bira malu i ta rekerí atenshon médiko,”el a bisa. Diputado Nina den Heyer tambe a papia. “No ta simpel un trabou sino loke boso a logra awe ta pa algu serio. Boso ta awor zùster di Fundashon Mariadal. Boso nòmber no ta bai ta konosí. Boso lo tei momentu di nasementu di un hende, i na despedida di dje for di mundu, ”diputado den Heyer a menshoná.

Despues a kontinuá ku e parti di huramentashon i seguidamente entrega di diploma.

Share This
error: Content is protected !!