KRALENDIJK – Fundashon Boneiru Limpi i Bunita awor lo ta mas den publisidat, tabata loke Onnie Emerenciana a menshoná durante un enkuentro ku prensa na start di e kampaña di limpiesa den bario. El a bisa: ”Promé e nòmber di nos fundashon tabata Tene Boneiru Limpi i awor a kambia esaki. Tin un direktiva nobo i nan ta entusiasmá pa bai hasi limpiesa, no solamente den bario, sino den área di kunuku tambe. Ta bai pone hopi énfasis riba e parti di konsientisashon i informashon pa e pueblo di Boneiru, i spesial pa nos hóbennan.

Awor ta bai duna lès na skol pa konsientisá e hóbennan loke ta algu ku ta importante i ku nos mester ta orguyoso kon limpi nos isla ta. Boneiru ta un di e islanan den Karibe ku ta mas limpi. Ora bo yega komo bishitante, ta notabel ku tin tiki shushi di entre otro kùp di plèstik riba kaya.

Danki na e trahadónan di Selibon N.V. ku ta hasiendo un tremendo trabou. Hopi hende ta bin biba na Boneiru i no tin e kultura di mantené isla limpi. Pa e motibu aki nos ta mira ku despues di sierto aktividat, ta laga hopi sushi atras. Hopi bia despues di un aktividat ta laga tur kos bentá i ta asumí ku ta Selibon N.V. mester atendé. Si laga e kosnan atras, buriku ta pasa kibra e sakunan i plama tur kos den e área krea un mahos bista. Un di e kosnan ku sushedat ta trese ta malesa manera entre otro Chikungunya i Zika’. Ta bin yen di insektonan manera kakalaka, raton, djaka i mas. Mi ta hopi kontentu ku e inisiativa aki, kaminda hopi ‘stakeholders’ ta uní i nos por logra hopi. Union ta hasi forsa pa nos hasi i mantené nos Boneiru limpi i dushi laga pa biba,” Emerenciana a menshoná.

Share This
error: Content is protected !!