EDITORIAL SKIRBI PA: FITTIPALDI PIETERSZ

KRALENDIJK – Ramonsito Teresita Booi meresé un rekonosementu awor, pa loke el a hasi pa Boneiru. E hòmber a sufri sin motibu, miéntras e tabatin rason di tabata funshoná korekto, i a hasi kos grandi pa Boneiru. Esei ta e realidat. Aparte di Ramonsitio, Burney El Hage ta e otro persona ku tambe i huntu ku nan famia a sufri inosentemente hasiendo bon pa Boneiru. Tur investigashon a mustra kla ku ni sikiera un akusashon tabata bèrdat. Mi no ta bai den detaye pasobra esei ya ta kapítulo di pasado. Mi no ta tuma parti pa niun hende, tampoko partido polítiko. Simplemente mi ta trese e bèrdat di loke a sosodé i ku no por a kastigá Ramonsito, i awor mester a pidié despensa. Sigur ta mas ku na su lugá pa pidié despensa, sinembargo loke el a pasa den, no por drecha mas. Meskos den kaso di El Hage.

Diferente bia mi a skirbi di Ramonsito, entre otro den korant, tokante e problema nan, sin menshoná mi nòmber. Mi a hasié pasobra mi tabata sinti ku e tabata inosente sierto momentu, awor esei a bira realidat.

ALGU DI BETICO CROES (QEPD) DI ARUBA

Hopi orguyo tin ku Betico Croes, kende a bai nos dilanti hopi aña pasa, kende a lucha pa Aruba haña status aparte. Esaki ta mas ku na su lugá, pasobra el a lucha pa Aruba i a logra loke hopi tabata deseá. Hopi aña tur hende a gosa di loke a sosodé. Último tempu por tende gritunan aki aya: ta mihó nos laga status aparte i bai den Hulanda, algu manera Boneiru. Mi pregunta ta? Betico ta bai pèrdè su atenshon pa loke el a lucha pa Aruba i e pueblo di e tempu aya? E desishon ta tumá i kualke situashon ku presentá mester kontinuá ku lucha. Kada desishon tin su konsekuensia bon i ménos bon.

KONTINUASHON RAMONSITO BOOI

Meskos ta e motibu pa grita danki na Ramonsito Booi. E hòmber a hasi hopi, i kisas por a logra mas pa Boneiru si no a strob’é. Hende a purba kibr’é, loke ta nifiká kibra nos tur. Kos por tabata mihó awe pa nos, si no a saka pia pa Ramonsito. Loke Ramonsito a hasi meresé un selebrashon, kende a pèrkurá pa nos bira parti di Hulanda i nos a vota pe. Nos no mester lubidá kon tabata keha pasobra Kòrsou no ta manda sufisiente sèn pa nos desaroyo. Ramonsito a hasi su trabou komo diputado e tempu aya pa hinka nos den Hulanda i huntu ku pueblo su voto, nos a logra. Awe e islanan ruman esta, Kòrsou i Aruba ta murmurá pa yudansa di Hulanda i ta notabel, no awor debí na ‘coronavirus’, sino ya for di algun aña anterior, nan situashon ekonómiko, spesialmente di Kòrsou tabata den dekadensia. Miéntras tantu esun di Boneiru tabata subiendo ku spit haltu. No ta ami ta bisa, sinembargo ken ku bo topa ta ekspresá mes kos, i si skucha notisia, ta problema tras di problema  na hermana isla Kòrsou tur dia. Nos no ta pro e loke ta sosodé na Kòrsou. Hopi di nos kisas mayoria tin un òf mas famia aya. Di kurason nos ke pa bai bon ku nan. E no ta den nos man. Pueblo huntu ku gobernantenan di Kòrsou a skohe pe.

Pa bai bèk na Ramonsito, loke el a lucha pe nos a logr’é i ta kosecha éksito kuné. Malasuèltu a toka mundu ku e asuntu di vírùs, sinembargo e situashon a laga islanan di Karibe hulandes mira ku mihó nos  tabata huntu i den Hulanda pa un mihó bibá pa nos tur. Duna e hòmber un rekonosementu. El a sufri pa nos a haña un mihó bibá. E realidat!

E artíkulo ta skirbi pa ami Fittipaldi Pietersz, komo suidadano, algun dia despues ku Ramonsito i Burney a sinta na mesa ku fiskal mayó pa tuma nan despensa ku a kastigá nan inosentemente. 

Share This
error: Content is protected !!