KRALENDIJK – Hues di Korte den Promé Instansia di Kòrsou, mr. C. Nootenboom-Lock, a rechasá den un huisio sumario ku Bonaire PetroleumCorporation (BOPEC) NV a entablá kontra di ‘StichtingDerdengeldenBurgers&Fung-A-Loi, tur eksigensia di e demandante. BOPEC a keda kondená tambe pa paga e gastunan di Korte ku e fundashon a hasi, na balor di mil dòler.Djámars atardi el a dikta veredikto den e kaso akí.

E kaso

BOPEC, kompania di almasenamentu di petroli, sukursal di e e kompania venezolano PDVSA, pa motibu di sanshonnan ku Merka a tuma kontra Venezuela, no por hasi negoshi ku ‘Personanan di Merka’. Esei ta konta tambe pa kasonan kaminda tin asuntu di intermediashon di parti di bankonan intermediario òf di negoshi den dòler. Si esei tuma lugá ta para e transakshonnan akí.

Refineria di Kòrsou (RdK), Curaçao RefineryUtilities (CRU) i CuraçaoOil (Curoil) riba 12 di sèptèmber 2019 a haña eksonerashon di Office ofForeignAssers Control (OFAC) di e prohibishon total, ku a keda prolongá te 30 di yüni 2020.

Basá riba e eksonerashon akí BOPEC por a bende 80.000 te 85.000 bari di zeta ku Curoil. Ta depositá e plaka riba un asina yama ‘Kuenta di Escrow’. Ta usa e plaka aki pa paga gastunan operashonal, di personal i pa drecha e Jetty na Boneiru. Entidat Públiko Boneiru a apuntá e fundashon komo atministradó di e ‘Kuenta di Escrow’. Entretantu a pidi un eksonerashon nobo, ku ainda no a keda duná.

Demanda pa kumpli

Awor BOPEC ta eksigí pa Korte ordená e fundashon pa keda kumpli ku e asina yamá ‘kombenio di Escrow’, despues di 30 di yüni 2020 tambe, ikeda hasi e pagonan menshoná. Si no kumpli ku esaki, e fundashon lo mester paga e kompania 25.000 dòler pa kada dia òf parti di dia ku keda sin kumpli i pa paga e gastunan di Korte. BOPEC ta di opinion ku e fundashon inhustamente ta bisa ku ora e eksonerashon vense, no por sigui paga mas. E kompania ta alegá ku sin eksonerashon por sigui usa e plakanan ku tin awor riba e kuenta pa paga entre otro salario. Pago di e salarionan ta bou preshon, loke ku no ta na bentaha di e kompania i su trahadónan. Ademas e fundashon no ta un ‘Persona merikano’i no ta kai bou di e òrdu di Merka.

E fundashon tin opheshon kontra kontinuashon di pago di e plakanan despues di 30 di yüni, pa motibu ku den e Kombenio di Escrow a pone un relashon dirèkt ku e eksonerashon. E eksonerashon a vense, di manera ku fundashon ku rason ta alegá ku e no ta outorisá pa keda hasi e pagonan. E fundashon no kier kore riesgo ku ta pon’é i e kantor di notario liá, riba un lista pretu.

Opheshon hustifiká

Hues ta haña e opheshonnan di e fundashon hustifiká. E ta bisa ku bou di e sirkunstansianan reinante no por kondená e fundashon pa kumpli ku e pagonan i ku mester buska un otro solushon pa esakinan, teniendo kuenta ku e interesnan di esun ku tin derecho riba nan. Esaki ta nifiká ku mester rechasá e demandanan, manera presentá.

Share This
error: Content is protected !!