KRALENDIJK – Radio Live 99.9FM a sostené un entrevista ekstenso ku Norwin ‘Nochi’ Willem, kende ta sekretario di Union di Sindikatonan Boneriano [USIBO], ku ta sostené e dos sindikatonan BPWU i FEDEBON. Esaki relashoná ku e situashon di BOPEC. “ Nos a sinta den kantina na BOPEC pa un reunion yamá, pa motibu ku e gerente di BOPEC establesé na Venezuela a pidi e trahadónan pa medio di sindikato, pa nan firma un akuerdo di no tin opheshon pa nan haña salario di  luna di yüli i ougùstùs pagá awor. Motibu di esaki ta ku debí ku 30 di yüni e lisensia ta ekspirá. E lisensia ku ta ekspirá ta indiká ku e sèn ku tin riba e ‘S Growacount’, no por hasi uso di dje mas. Nan a pidi trahadónan pa medio di sindikato, pa nan firma un deklarashon ku nan no tin opheshon, pa promé ku e fecha di 30 di yüni, nan paga 2 luna di plaka na e trahadó.

Nos a aserka nos abogado i el a menshoná ku nos por bai ku e esaki kontal ku no ta mishi ku derecho laboral ku tin pendiente tantu di CAO i komo esnan ku tin IAO, i loke lei laboral di BES ta preskribí. Trahadónan a bai di akuerdo i a firma pa sostené un kaso huisio sumario ku BOPEC a entamá kontra e notario kende ta manehá e S-Growacount. E notario ta e persona ku por disidí si e ta los e sèn si òf no. El a bai di akuerdo pasobra e no ke hasié riba su mes. Si e haña un sentensia diktá pa hues, esei ta hasi su trabou mas fásil, segun e notario. E kaso a tuma lugá djabièrnè i awe e sentensia a yega. Esaki ta enserá ku nan ta deklará BOPEC no atmisibel.

Esaki debí ku falta un partido den e korte ku ta CUROIL. CUROIL tabata esun ku a haña e lisensia for di sèptèmber 2019, pa e por a komersialisá 85 mil bari di petroli, kumpr’é i bende ku Contour Global pa e kompania por a sigui produsí koriente pa e isla. Esei no tei mas i gezaghèber a anunsiá otro forma pa yega na fuel pa por sigui produsí koriente  pa Boneiru. Esaki a pone ku nos komo sindikato a drenta den akshon pa wak kon ta bai hasi awor, pasobra hues a bisa ku e sèn ei no por us’é pa paga trahadó di BOPEC. Pues fin di luna di yüli no ta bai tin sèn pa paga trahadó. Nos a papia ku CUROIL, gezaghèber i minister di CUROIL pa wak kon por yega na solushon. Nos a pidi pa tur esnan ku por yuda duna un man pa solushon.  

Nos a hasi yamada na tur trahadó keda ku pasenshi apesar di e situashon pa wak kon ta bai yega na solushon. E meta ta pa tene BOPEC habri. E aña aki ta 45 aña di eksistensia di e kompania. Tene habri ta nifiká trabou pa e hende i entrada pa nos ekonomia di Boneiru. Sea ta deklará BOPEC bankarota òf Chonki Delanoy ta ehekutá su beslag i ta bende BOPEC na findishi, i asina nos ta haña un kumpradó nobo. Si tin kumpradó nobo lo tin kontinuashon di BOPEC i hopi hende lo haña trabou pa drecha i duna servisio na e kompania. E sanshonnan ora pa ora ta bira mas fuerte. Merka lo no suavisá e sanshonnan miéntras presidente Nicolas Maduro ta na mando. Nos ta komprondé PDVSA su orguyo, ta su propiedat den un lugá stratégiko pa almasena e produkto petrolero. Nos no tin akshon kontra PDVSA, CUROIL i niun gobièrnu.

Simplemente nos ta pidi pa esnan ku por duna un man pa yuda solushoná e problema di BOPEC den un forma duradero. Nos ta duna tur sosten na PDVSA, pasobra nan a kumpli kabalmente ku paga pa tur trahadó. Awor ta importante pa yega na un forma pa sigui paga e trahadó di e kompania. Gobièrnu tin plan pa e aspekto di reda pa yuda pa e trahadó di BOPEC  haña un plan sosial, si kos bai robes. Si BOPEC sera sigur den e temporada aki, kombiná ku e situashon di COVID-19, e ta krea un desaster sosial. Pues mester hasi tur posibel pa tene e kompania habri. Nos ta pidi pa tur trahadó apesar di e situashon keda kalmo pa no stroba e proseso ku por yega na solushon pa e situashon,” Norwin sekretario di USIBU a menshoná.

Awe djarason pa 2:30 di atardi a yama reunion di urgensia pa trahadónan di BOPEC.

Share This
error: Content is protected !!