KRALENDIJK – Segun suidadano Arthur Sealy den un komunikado pa prensa, Bonaire no ta den su mihó posishon pa motibu di e tantísimo problemanan ekonómiko, sosial i polítiko. Riba tereno di ekonomia tin e asuntunan di BOPEC i turismo. Riba tereno sosial e problemanan di pobresa, bibienda popular i infrastruktura pa dibertishon ta sumamente grandi. Riba tereno polítiko a sali na kla ku no tin konfiansa den e koalishon UPB/MPB. E problemanan aki ta konektá ku otro i e promé yamá pa bini ku ideá ku ta kondusí na un vishon relashoná ku desaroyo di Bonaire ta Kolegio Ehekutivo kontrolá, a base di bon gobernashon, pa Kolegio Insular. Kolegio Ehekutivo pa medio di diputado Elvis Tjin Asjoe ta trata na promové ekonomia basá riba e prinsipio Ekonomia blou. E falta grandi ta ku no ta trese ningun klase di optimismo bou di pueblo pa karga e pensamentu aki. Ta tende solamente pesimismo, manera ku ta bai dura pa turismo rekuperá i ku ta enfatisá turismo di klase i ku konstrukshon ta bai haña sla.

Esaki ta nifiká ku por lo pronto komersio relatá na turismo i konstrukshon ta bai kremp. Un otro punto di pesimismo ta ku ta spera un di dos ola di Coronavirùs. Mester buska e solushon den e relashon entre labor i kapital i pone bienestar general dilanti i no interes individual. Na griego e palabra pa esnan ku tin pensamentu individual ta idiotes. Kombersashon i tayer ku stakeholders ta duna poder na un grupito i gaña pueblo ku si bai bon ku e stakeholdernan di mes pueblo ta benefisiá. Skohe pa stakeholdernan ta skohe pa idiotes.

Benefisio pa pueblo ta sintá den por ehèmpel agrikultura, enseñansa i salubridat. Laga nos mira agrikultura. Ta duna informashon na stakeholdernan di kunuku. Kunukero i hóbennan ku ke bira kunukero ta haña un pidi tereno, edukashon kon planta, kon gordo tereno, kon atministrá e produkshon i tin protekshon 24/7. Hefe di LVV a skohe pa bienestar general i no pa idiotis. Tin hopi ehèmpel kon enseñansa i salubridat ta na benefisio general i ta brinda optimismo. Koalishon tin e obligashon di tuma na serio resultado di un enkuesta ku ta mustra ku 43% ta di akuerdo ku maneho di koalishon MPB/UPB. 43% ta representá solamente kuater asiento den Konseho Insular. Haal je som uit meneer Tjin Asjoe.

Share This
error: Content is protected !!