KRALENDIJK – RCN/OCW den estrecho kolaborashon ku OLB i unidat MBO di Scholengemeenschap Bonaire ayera a tene un enkuentro ku prensa. Durante e enkuentro ku prensa a elaborá entre otro riba e desaroyonan rondó di estudio na MBO,’ Konstruí bo futuro’. Diputado Nina den Heyer tabata promé persona ku a dirigí palabra na e okashon.  Covid-19 a perhudiká nos, i na otro banda el a trese otro desaroyonan nobo. Ta importante pa e hende desaroyá su mes. MBO ta kanando un tremendo trayekto, pa sigui duna oportunidat pa studia. No solamente nos hendenan di Boneiru, sinembargo esnan di islanan besiña tambe ta bon bini,”diputado den Heyer a menshoná.


Despues a papia Liset de Keijzer, direktor di unidat MBO, SGB. El a duna un bista tokante kon e lèsnan ta hinka den otro na MBO. El a menshoná ku tin estudio pa tur hende di tur edat. “Nunka no ta lat òf edat ta muchu haltu pa un kurso serka nos. E diploma ta un rekonosé pa Hulanda. E gastunan na MBO ta minimal, sigur no pa kompará ku otro skolnan den eksterior. Tambe tin e posibilidat pa por studia i traha. Entre otro tin, kurso di sekshon di Horeka i turismo, konstrukshon i tékniko, ekonomia, atministrashon, deporte, media i mas. Pa mas informashon por pasa na Kaya Korona 4 òf bishita [http://www.mbobonaire.com. ,” de Keijzer direktor di MBO a bisa.

Despues a papia Arthur Korevaar, mènedjer di  RAP, RCN SSO-CN. El a papia tokante e parti kon ta bai atendé ku e edifisionan nobo di MBO i e parti di kamindanan den e área pa tráfiko no pega momentu ku tur e skolnan na e sitio ta kla.

Seguidamente a papia Nolly Oleana direktor RCN/OCW.
El a papia di e estudionan ku ta bai tin di parti di SGB i MBO. “Ta hopi importante pa esnan ku ke logra un diploma logra esaki, pasobra sin un diploma ta bira dia pa dia mas difísil pa haña un trabou. Sigur un trabou ku ta paga bon. E estudio ta pòrnada. Solamente mester paga pa buki. Tur hende por yega na fiansa pa un estudio. Solamente si bo ta mas ku 30 aña di edat, bo no ta bin na remarke pa un  finansa pa estudio. E diploma di MBO, tin igual  balor ku esun di Hulanda. Nivel 1 i 2 ta na papiamentu i 3 i 4 ainda ta na hulandes. Boneiru tin un nivel di ICT di último ‘update’, i ku esaki ta ferwagt ku hopi hende ta opta pa bin Boneiru pa studia.  
Si un persona tin un kamber disponibel, pa un preis rasonabel, pone nos na altura. Semper nos di Boneiru a bai Aruba i Kòrsou pa sigui studia aya. Awor ta turno pa nos ofresé  nan un lugá pa biba temporal,” Oleana direktor RCN/OCW a bisa. A menshoná e atardi ku tin un plan pa krea un edifisio ku ta bai funshoná manera un ‘kampus’, esta un lugá pa e studiante por keda riba tereno di skol kaminda ta SGB awor.

Share This
error: Content is protected !!