KRALENDIJK – E ekipo di biar di Nort Saliña/Kunuku Bieu ku ta Azteca, a titulá kampion di biar Bola-8, rekonkistando e título kampionil despues di dos kampionato.

Azteca den e ultimo partido di e seri final mihó di tres partido djamars anochi, a gana di Mastertouch ku skor pèrtá di 5-4 pa bira kampion di e kampionato ku ta dediká na e ruman nan biarista di Rincon ku ta Jòs i Julius Clarenda die ekipo di La Tropicana di Rincon.

Tabata un tremendo partido ku dado momentu Mastertouch a pika 4-2 dilanti, faltando unu mas pa gana e partido i titulá kampion.

Pero Azteca ta bòns bèk den wega, gana tres siguí i bai ku e título máksimo di e kampionato.

Pa loke ta sètnan di e partido,

Garino Molina a pèrdè 2-0 ku Janiro Chatlein ku un 7 bola.

Milton Anthony a gana Gorge Saridjan 2-1.

Arnold Ford a pèrdè 2-0 ku Marvin Abdul.

Vladimir Mercera a pèrdè 2-1 ku Francis Winklaar.

Gilbertson Serberie a gana Rachid Pauletta 2-0.

Rocklin Martis a pèrdè 2-1 ku Marnix Abdul.

Cedric Anthony a gana Naygel Coffie 2-0.

Gilbert Alberto a gana Zarquion Statie 2-0.

Javier Sof a gana Edelbert Winklaar 3-2.

Siguiente dia, djarason promé di yüli den sala di biar di Kompleho Deportivo Jorge Nicolaas na Kaya Amsterdam, tabatin premiashon di e kampionato 2019-2020. Na e premiashon aparte di e dirigentenan di FeBiBo ku ta e federashon di biar di nos isla, tabata presente tambe diputado di deporte sr. James Kroon, tambe e timnan i hungadó nan ku a kai den premiashon.

Tabata e presidente di FeBiBo, sr. Aaron Martis, ku a habri e anochi di enkuentro pa premiashon.

Despues a hiba palabra tambe Jòs Clarenda na ken e kampionato tabata dediká huntu ku su ruman Julius Clarenda.

Tambe a dirigí su mes na e presentenan, e mandatario enkargá ku deporte di nos isla ku ta sr. James Kroon.

Huntu ku e presidente di FeBiBo tabata presente tambe sr. Edsel Pieter, ku ta tesorero di e federashon di biar, ku tabata enkargá tambe ku e parti di premiashon.

E parti premiashon a kuminsá ku e premionan individual, ekipo mas disipliná i yega na e kuater ekiponan mas ariba na final di e kampionato.

Tambe a hasi entrega di rekuerdonan na Jòs Clarenda ku a risibí tantu e rekuerdo pa su persona komo tambe di su ruman Julius Clarenda, ku no por tabata presente.

Premiashon:

Kampion ta Azteca.

Supkampion Mastertouch.

Di tres lugá Sharp Shooters.

Di kuater lugá The Untouchable.

Ekipo mas disipliná ta Ricochet.

Hungadó ku mas wega ganá durante kampionato ta Marnix Abdul.

Hungadó ku mas 7 bola pasá ta Janiro Chatlein.

E timnan kampion i supkampion ku ta Azteca i Mastertouch, banda di trofeo, tur e hungadónan a risibí un medaya.

Share This
error: Content is protected !!