KRALENDIJK – Raquel Mercera, un persona bon konosí den komunidat Boneriano, a bai sosegá. Un hende stret, kla i raspá pa esun ku intentá algu den su direkshon. Raquel ta di e bario di Rincon, pero ta den Playa e tabata move mas tantu. Fittipaldi Pietersz: ”Mi konosé Raquel for di mucha momentu ku mi sa bai stadion na Playa pa wak wega di futbòl. E tabata sinta den tribuna parti pabou kasi te abou na e trapi. Si, mi ta kòrda bon bon. Mi sa ku e tabatin un bos i un poder komo fanátiko fuerte. Hopi konosí e tabata, e forma kon e ta ekspresá loke e ta mira, i si e no ta di akuerdo ku e situashon, e no ta spar niun energia pa e deshogá tur loke e ta deseá, pa e ta na pas ku su mes. Raquel, siendo bibá na Playa a keda un fiel fanátiko di e ekipo Real Rincon. Pena la bida papia algu malu di Real Rincon den su presensia. Mi no por kòrda kiko eksaktamente a sosodé entre ami kuné, hopi aña pasá. Loke si mi ta kòrda el a bisami: tende ki mucha, no hasi wega kumí i si bo ke bo bai bisa bo tata e tambe ta haña. Stret i kla. Sigur el a spantami. Si mi por kòrda te dia di awe, mi no a bisa mi tata nada loke el a bisami, hahaha. Tantu mi mama i mi tata semper tabata bon kuné. Tempu a pasa i Raquel a keda semper e persona ku e tabata. Tin un ‘spreekwoord’ ta bisa ‘blaffende honden bijten niet’, den kaso di Raquel ta un ‘uitzondering’. No solamente e ta ‘blaf’, sinembargo si e tin ku morde e ta hasié. E ta un persona stret, sinembargo e tabatin amor i pashon pa hopi hende. Spesialmente su famia ta nifiká hopi p’e. Simplemente e tabatin un karakter fuerte i no ta tolerá. E ta poné bo na bo lugá. Semper mi sa top’é i e ta kuminda i puntra p’ami hendenan na kas. Algun tempu pasá e kurpa no tabata asina fuerte mas, i e mester a bai Kas di Kuido pa atenshon ku mas frekuensia unda el a pasa e último añanan di su bida. Ta un proseso normal di bida ku tur hende ta yega momentu ku edat subi, i ta rekerí atenshon kontinuo. No tin duda den esei. Na diferente okashon mi tabata top’é momentu mi bai pa kubri algu di trabou na Kas di Kuido, òf bishitá un hende aya. Semper bo ta hañé sintá pegá ku entrada di Kas di Kuido. Ora mi top’é, e ta komandámi ku hopi atenshon i un sonrisa, ekspresá amor i mi ta bras’é i dun’é un sunchi. Na mes momentu kisas no ta muchu bunita, sinembargo e ta ekspresá ku e ta kuminda ami i otro hendenan ku ta huntu ku ami e ta kòrta nan un wowo, manera ta bisa. Raquel tabatin un personalidat úniko. Su kara hopi biaha tabata será, e ta gusta zundra, pero tras di e kara ei e tabata tòg un persona amabel i ku bon kurason. E sa pidimi tambe pa move kuné di un sitio pa otro. E tabata kombersá ora nos topa i tin bes e ta kontami di sierto situashon ku no ta korekto. E tin rason i no ta skonde nada. Asina ta Raquel. Tin bia ta nesesario un persona fuerte den komunidat, pa papia loke otronan tin miedu pa ekspresá. E hende por ekspresá kisas fuerte, sinembargo ta nesesario. Raquel tabata un persona ku tabata generá entrada dor di hasi diferente trabou pa habitante i komersiantenan den Playa. Entre otro un hasidó di rospondi den Playa. Djarason anochi mi a tende ku e ta malu i pa djaweps mainta mi wak riba ‘facebook’ ku el a bai sosegá. Forsa na su yunan i demas famia. Dios lo dun’é un lugá den su reino pa e sosegá na pas.  

Potrèt Raquel durante parada di grandinan di Fundashon Mariadal 2019. 

Share This
error: Content is protected !!