KRALENDIJK – John-Marie Nicolaas, e nòmber aki no bisa niun hende nada. Hopi bia un hende tin ‘bijnaam’ i ta bisa e no ta bunita pa menshoná. Den kaso di ‘Pichiri’ ta bon pa menshon’é. E no ta referí na un bèrdat pa su persona. Semper tur hende a rekonosé i yam’é asina. ‘Pichiri’ despues di 9 luna ku e no por a mira nada, awor tin su bista bèk.

‘Pichiri’ tabata entrenadó di tim di sòftbòl Sonrisa pa hopi aña. Ta trata di un ekipo di sòftbòl di hende muhé.

E miembronan di e tim huntu ku esnan di La Sonrisa ku ta e tim di hende hòmber, a yega na e idea pa sorprendé ‘Pichiri’ riba su fecha natal, i selebrá huntu kuné su 52 aña di bida.

Tabata un alegria pa ‘Pichiri ta presente huntu ku su hendenan, i a opta pa selebrá e fiesta na ‘Jossy Boekhoudt Ball Park’. Momentu ku mi a yega na e sitio ariba menshoná, saludando algun persona mi a tende nan menshoná ku ‘Pichiri’ a rekonosé Fittipaldi. Momentu ku mi a aserk’é ,el a bisa: Edson konta? Bèrdat asina e ta yamami. Mi sa ku ‘Pichiri’ ta siegu, loke mi a tende i eksperensia na algun momentu ora mi ta bai kubri kos di aktividat sosial i top’é. Mi tabata bis’é ku ta ami ta su dilanti pa e sa ku ken e ta papia, pasobra e no ta mira.

Mi a aserk’é, salud’é i el a rekonosémi bon i nos a kombersá.

‘Pichiri’:” 9 luna mi a pasa siegu i awor a rekobrá mi bista. Hopi hende no ta kere ku mi tin mi bista, i nan ta hasi tur manera pa komprondé di bèrdat si mi ta wak atrobe òf mi ta rekonosé hende pa nan stèm. No, mi ta wak normal manera un hende ku tin su bista. Danki na Dios mi ta kontentu i relahá. Skuridat di siegu ta doló, prekupashon i bashí enorme den bida. 

Mi ta hopi kontentu di por mira i selebrá ku mi hendenan. Nan a bisami nan no ta bisa nan nòmber i ta deseá pa ami mes rekonosé i bisa nan nòmber loke a sosodé. Mayoria di nan no tabata sa ku mi a rekobrá mi bista. Nan a keda hopi kontentu i impreshoná.”

‘PICHIRI’

Kon a yega na e nòmber Pichiri? ”Mi nòmber ta John, sinembargo práktikamente niun hende no sa. Hopi hende ta kere e nòmber di ‘Pichiri’ a bin di e mundu di fiesta di Sanikolas, pasobra mi tabata un ‘zwarte piet’ pa hopi aña. Ben Oleana ta outor di e nòmber ku mi tin ku ta úniko, esta ‘Pichiri’. Mi no tin niun problema si un hende yamami asina, sinembargo niun hende no ta yamami John.     

For di mi 7 aña di bida, pues awor ya pa 45 aña tur hende ta rekonosémi komo ‘Pichiri’, e nòmber ku Ben mi amigu a dunami, ”Pichiri a konta ku hopi alegria.  

Share This
error: Content is protected !!