KRALENDIJK – Ya pa algun luna nos ta den gara di vírùs di ‘corona’, loke a pèrkurá pa diferente aktividat grandi ta kanselá.
Entre otro selebrashon Dia di Rincon no a tuma lugá manera kustumber, esaki debí na e pandemia di COVID-19.  
Pa loke ta trata Regata di Boneiru 2020, no ta sigur ku e aktividat ta tuma lugá. Ta studiando e fecha eksakto ku normalmente ta organisá Regata, si akaso ta bai organis’é. Ta papiando di entre 7 pa 10 di òktober, òf di 14 pa 17 di òktober. Na e momento aki no tin nada definitivo debí ku gobièrnu di Boneiru no a tuma desishon.  

Radio Live 99.9 FM por komprondé di su fuentenan ku e organisashon di Hype Events ku a organisá Regata di Boneiru e último añanan, a manda un karta pa gobièrnu for di novèmber 2019, yamando danki pa e konfiansa depositá den nan pa a organisá e Regata.  

Hype Events a informá ku nan no ta interesá mas pa organisá Regata, ya ku nan tin diferente otro proyekto pendiente, ku nan lo bai konsentrá ariba durante añanan ku ta na kaminda. 

Di otro banda Notisia live 99 FM a komprondé ku gobièrnu ta papiando ku diferente organisashon pa organisá Regata. Un di nan ta Aquaspeed pa organisá e parti di laman, sinembargo tin kombersashon tumando lugá pa un kompania di zonido, wak si nan ta deseá pa organisá e festival di Regata di Boneiru den futuro. Pues tin intenshon pa separá Regata di Boneiru den sentido ku un organisashon ta enkargá ku e parti di kompetensia riba laman ku boto, i un otro organisashon ta enkargo ku e  festival anochi. 

Na e momentu aki no tin un klaridat kiko ta bai sosodé ku Regata di Boneiru. E chèns ta grandi ku e aña aki no ta bai tin Regata.

Esaki mirando e asuntu di distansia sosial i problemátika di COVID-19, ku mundu kompletu tin atenshon, kon e ta desaroyá. Ta pensando riba e posibilidat pa organisá Regata 2020 solamente pa e suidadano lokal, i no internashonal. No a tuma desishon si ta bai organis’é , i e organisadó nobo kisas no ta deseá pa organisá Regata pa e hende lokal, loke no ta krea e ambiente kustumbrá. Ta pensa ku si ta solamente hende lokal, e ta pèrdè e sabor di e Regata kustumbrá.  

Notisia Live99FM ta pendiente di un informe ofisial di gobièrnu di Boneiru, pa tende kiko ta bai sosodé ku Regata i su futuro.
Un kos ta sigur Hype Events a yama danki di por a organisá Regata 3 aña i awor mester buska un organisashon nobo pa tuma enkargo di e aktividat.

Share This
error: Content is protected !!