PLAKA DI MÉRITO PA RICHINEL ANTHONY I RIGNALD ‘TIRI’ TRINIDAD

KRALENDIJK – Resientemente gobièrnu di Boneiru pa medio di SKAL a entregá plaka di mérito na dos gran artista Boneriano. Ta trata di Richinel ‘Rishi’ Anthony i Rignald ‘Tiri’ Trinidad. Esaki a tuma lugá na Posada Para Mira durante e aktividat “Chispa di Wan ku Pedu”.

Diputado James Kroon na nòmber di gobièrnu di Boneiru a menshoná ku e ta hopi kontentu di mira 2 persona ku un di nan sigur ta nifiká hopi pe musikalmente. “Tempu ku mi a kuminsá toka, e persona aki a hala mi atenshon i ponemi den lus. Ta trata di ‘El Gran Tiri Trinidad’. Pa loke ta Rishi, ta otro persona salí for di bario di Rincon i ta bon músiko. Nos di Boneiru mester mantené nos parti kultural haltu. No ta asina ku esnan ku ta bini di eksterior, ta yega i laga nos kultura bai pèrdí. Aktividatnan asinaki ta demostrá ku ta nos mes tin ku tene nos kultura bibu. Sigur nos músika krioyo i folklor tin ku keda den tòp. Gobièrnu di Boneiru ta bai sigui duna e sosten pa mantené nos kultura bibu i sigur nos músika krioyo. Di parti gobièrnu nos ta felisitá ‘El Gran Tiri’ i Rishi pa e plaka di mérito ku nan a risibí. Pronto nos ta bai hasi un grabashon huntu ku Tiri. Sigur e kantika ‘Sebé’, pa e forma kon Tiri ta trese esaki dilanti. Ta importante pa hasi un grabashon di e piesanan aki. Di parti di SKAL mi ta spera nos kontinuá ku e selebrashonnan di nos tradishon. Tin futuro den e mundu di nos kultura, loke tambe ta notabel serka nos muchanan ku ta desaroyando huntu ku e grandinan.    

Despues di a risibí e plaka di merito for di man di diputado Kroon i hefe di Skal sr. Felix ‘Papito’ Thomas, Richinel ‘Rishi’ Anthony a dirigí algun palabra pa gradisi. “Manera semper nan ta bisa duna e hende su balor momentu e ta na bida. Mi ta apresiá e rekonosementu. Ta importante pa nos pasa nos konosementu di loke nos ta hasi musikalmente pa e hóbennan, ”Rishi a menshoná. Seguidamente a papia ‘El Gran Tiri Trinidad’. “Danki na SKAL i gobièrnu pa e rekonosementu. Sigur ta importante pa e hóbennan no laga e bida musikal krioyo bai pèrdí. Tin hóbennan ya ta kargando esaki, loke mi ta apresia. Nan ta dominá diferente instrumènt. Tin un proyekto andando kaminda e hóbennan ta bai presentá ku e parti di brass den músika krioyo. Esaki ta bai bira un inovashon den e músika krioyo. Un grupo di hóben ta bai presentá ku grupo Tuttifrutti pronto. Nan tin ku tene e kos aki duru i nunka mas e chispa lo paga, ”Tiri a bisa.

Share This
error: Content is protected !!