KRALENDIJK – Gobièrnu di Boneiru ta trahando duru pa drecha nos kareteranan, ku fondonan ku Hulanda a pone disponibel relashoná ku e akuerdo di gobernashon. Diputado enkargá ku infrastruktura Pablo James Kroon djabièrnè último a hasi ‘groundbreaking’ di e proyekto pa rekonstruí kaya Carlos A. Nicolaas. E trabou ta pa drecha e krusada kaya Grandi/Kaya Carlos A. Nicolaas, un pida di kaya Jean B.F Vitté i un pida di kaya J.E. Nicolaas. E krusada ‘y’ na kaya Carlos A.Nicolaas/kaya Grandi ta bai bira un krusada T, momentu finalisá e trabou. “Ta bai drecha e área kaminda ku ta trata di un situashon ku hopi aña ta rekerí atenshon. Ta bai kambia e krusada hasié T, otro for di loke a ta awor. Diputado a trese dilanti ku pa medio di e departamento di R&O ta hasi lo máksimo posibel pa bai trese kambionan pa asina e kaya por bira mas bunita i mas sigur pa tráfiko, habitantenan i e negoshinan. Poko poko i sigur nos ta drecha kayanan na Boneiru. Nos ta pidi poko pasenshi na outomobilista. Kamindanan ku ta pendiente pa drecha ta Kaya Amsterdam, Kaya Neerlandia, área di Hospital i e kaminda ku ta bai Rincon ku na e momentunan aki ta den un estado ku mester di atenshon mas pronto ku ta posibel segun diputado Kroon. Ta papiando ku Hulanda pa asina logra haña mas fondo ku ta posibel pa remediá e situashon di kareteranan. Awor ya ta drechando den Rincon ku e meta pa kontinuá ku mas,” diputado Kroon a bisa.

Despues a papia Wendell Bonefasio, kende ta direktor general di Boneriaanse Wegenbouw Maarschappij (BWM). “Awe ta un dia importante ku nos ta para aki. Mi ta poko yalurs riba Boneiru. Aki kosnan ta kana i ayabanda kosnan ta stanká. Spera poko di e airu di Boneiru ta bai Kòrsou, asina kambia a ‘vibe’ aya, i pa kos kuminsá kana na Kòrsou. E tim na Boneiru ta pèrkurá pa hasi un bon trabou. Ta bai hasi tur esfuerso pa den e tempu stipulá di 5 luna, hasi un bon trabou na e sitio. Loke sigur nos ta bai pone énfasis riba dje ta e parti pa awa no keda para momentu ku áwaseru kai. ‘Coronavirus’ a ataka mundu kompletu, apesar ku Boneiru a sali bon for di esaki kompará ku hopi otro den mundu. Ta bon pa nos aportá kaminda ta posibel, spesial esnan den sektor di Horeka, duna nan un trabou asina kada un di nos riba e isla por kontinuá, yudando nos ekonomia, sperando ku pronto e ta rekuperá i kontinuá,” Bonefasio direktor general di BWM a menshoná.  

Mènedjer di BWM na Boneiru Novile Bartholomeus tambe a dirigí palabra e atardi i a menshoná tokante e trabounan i loke ta bin na e sitio. “Ta bai koba e kaya kompletu pa saka e tera i pone un fundeshi firme i pone asfalt na final. Ta bai hasi e trabou den 2 parti. E promé ta e krusada dilanti di Napa Auto Parts, pa despues e otro parti di e kaminda ku ta bai direkshon di kaya Neerlandia. Ta bai drecha roinan ku betòn pa evitá ku e awa ta keda para un kaminda, hasi daño na e kaminda i pa nan ta bon fuerte pa fangu awa. E trabou ta bai dura mas o ménos 5 luna, debí ku mester atendé e parti di waya i pipa ku ta pasa bou di tera, i esaki ta tuma su tempu. Tin plan kon pa bai atendé pa e negoshinan den e área, nan kliente por kore yega sin ta un molèster. Tin pensamentu pa wak kon pone algu pa asina e velosidat di vehíkulo ta kontrolá momentu ku e trabounan finalisá. Nos tin diferente trabou na mes momentu sinembargo tin un skema i nos ta mantené nos mes na dje, i tur kos ta kana segun plan, ”Bartholomeus e mènedjer di BWM a bisa.    

Share This
error: Content is protected !!