KRALENDIJK – Marven M. a presentá dilanti hues pa responsabilisá riba un kaso ku a sosodé 17 novèmber 2019. “Pourier a deklará ku bo a pasa banda di Amstel Bar na Rincon i a manda mas o ménos 5 bòter di glas i dal den e outo. Ta visibel e markanan den e outo dor di e bòter nan. Tin grabashon di tur loke a sosodé,” hues a bisa i e ke tende di akusado kiko e tin di konta di loke a tuma lugá.

Akusado Molina a konta i a menshoná ku e outo a pasa i e tal Pourier a baha i a kuminsá un diskushon entre nan, i despues Pourier a bai suela i mi a skop’é den bringamentu. Despues mi a mira Pourier bai den dèshbort di su outo i mi a reakshoná tokante arma di kandela. Ta trata di dos hende di edat haltu ku tabata den diskushon kumi, sinembargo mi mester defendé mi mes i no por para laga nan maltratámi. Polis a presentá i mi a laga nan detenémi i mi no tabata bou di influensia di alkohòl òf droga. A sosodé na 2016 ku nan a kap mi di parti di un yu di Pourier. E tempu aya a trata mi kaso mi a bai prison inhustamente,”akusado Molina a menshoná.

Hues a wak karchi penal i menshoná ku na 2013, 2015, 2016 i  2018 Marven tabata den man di hustisia. “Pues ta probá ku bo ta diferente bia den man di hustisia. Bo tabata na man di MHC i tabata na ‘Kapriles Kliniek Kòrsou’. Reclasering ta proponé ku bo mester bebe remedi i buska trabou. Bo tin solamente 24 aña di bida,” hues a bisa. Akusado a bisa hues ku e ta bebe remedi i ta lanta hopi lat mainta, loke ta strob’é pa traha pero e ta bai atendé otro ku remedi pa e ta mas stabil.

Fiskal M. Boheur a bisa entre otro den su rekisitorio ku ta trata di 3 akusashon. “Ta trata di echonan kastigabel. Mi ta pidi un kastigu di 20 dia di prison di kua 9 kondishonal i bo no mester bai den prison. Bo mester  kumpli ku 20 ora di trabou pa komunidat. Mester paga pa e daño ku a keda hasi na e outo ku e mandamentu di bòter ku ta 485 dòler na daño di perwisio, ”fiskal Boheur a bisa.

Abogado Marga Van Lieshout a defendé su kliente i a bisa entre otro ku tin sierto kos ku Pourier ta gaña riba su kliente den deklarashon na polis.

Hues a sera e kaso i a bisa ku e akusashonnan ta proba. “Tin deklarashon di testigu i tur ta indiká loke a sosodé huntu ku e grabashon di video. Ta trata di kosnan ferfelu i ta hendenan di edat bo a fèrfelá ku nan. Sigui tuma remedi korektamente. Nos no ke mirabo mas den korte loke abo tampoko ta deseá. Bo no mester bai prison. Mester traha 20 ora di trabou pa komunidat i si esei no sosodé, bo ta bai prison. Si bo no paga e 485 dòler di daño di perwisio, ta konta pa 9 dia di prison, meskos e 20 ora di trabou pa komunidat,” hues a sera e kaso bisando.

Share This
error: Content is protected !!