KRALENDIJK – Rangel R. a presentá den sala di korte pa diferente akusashon kontra dje, ku a sosodé entre otro den luna di sèptèmber 2019. Entre otro ladronisia, destrukshon i mas. A posponé e kaso i mas lat durante dia a kontinuá. “Mi a bai laman i ora mi a regresá nan a bisami tabatin entrada hudisial na kas. Mi tabatin problema ku un hende i debí na esaki mi a destruí un bentana, sinembargo mi a bisa e doño di e lugá ku mi ta drecha esaki, akusado a bisa. Hues a menshoná ku e akusado ta reakshoná agresivo riba algu, esaki hopi rápido i ya tabata den man di hustisia, hues a menshoná.

Akusado ”Mi tin un debe di loke nan ku a sosodé i mi ta bai paga tiki tiki te dia mi kaba. Mi a proponé pa paga mas o ménos 100 pa 150 dòler, ”Rangel a bisa. Hues a bis’é ku na polis el a deklará algu i tabata hari i no tabata tuma e kos na serio, i awor den sala di korte ta papia di algu otro i ta bisa esaki ta loke a sosodé. “Un kos ta straño, si un hende debebo i e ta dunabo su karchi di banko i su ‘pin code’ pa bo lanta un sèn ku e debebo. Dikon e no ta hasié E mes, esta bai un bankomátiko i lanta e sèn p’abo? Akusado a bisa hues ku esaki a sosodé debí na konfiansa ku otro.

Fiskal M. Boheur a trese den su rekisitorio ku ta trata di 4 akusashon. “Atendé sin rèspèt pa polis, loke no ta korekto. Polis tei pa pone òrdu i mester respetá nan. Loke bo a papia awe ta kontrali di loke tin den e deklarashon ku bo a duna na polis. Mi no ta kere ku e persona a dunabo su karchi pa bo lanta sèn. Loke nan a sosodé ta echonan kastigabel. Mi ta pidi 2 luna kondishonal kastigu di prison i 2 aña di prueba,”fiskal a bisa.

Abogado E. Winkel a defendé su kliente i a menshoná ku e kliente ta deseá pa paga loke el a destruí.” Tin dos fecha pa loke ta trata lantamentu di sèn na Banco di Caribe ku e karchi, i e kos no ta muchu kla. Mi kliente a lanta sèn, i bèrdat el a lanta poko mas ku loke e otro persona tabata debe. Mi kliente ta hopi yòn i e ta A.O. debí na un fraktura i no por kana bon. Ta bon pa tene kuenta ku esaki momentu ta dikta su sentensia,”abogado E. Winkel a bisa.

Akusado su lastu palabra tabata ku e ta bai drecha e bentana di e establesementu chines. Hues a sera e kaso i a bisa: ”Mi ta mantené loke fiskal a pidi. Poko poko bo kasonan ta bira serio, esta bo kaso nan trata den korte. Bo komportashon no ta korekto. 2 luna kondishonal i 2 aña prueba i mester paga e debenan ku ta konosí p’abo,”hues a sera e kaso bisando. Akusado ta keda den prison. Riba potrèt akusado yegando sala di korte awe mainta teniendo na un krùk.  

Share This
error: Content is protected !!