KRALENDIJK – Resientemente tabatin instalashon di direktiva i miembronan di ‘Shoko Advanced Toastmaster Club’. Shoko Advanced Toastmaster Club ta e di tres Toastmaster Club di Bonaire.

E klup a ser fundá pa Sapphira Coffie i Jefferson Rosalia den kuadro pa e dos toastmaster aki logra e distinshon máksimo komo un Toastamaster kual ta e título di Distinguished Toastmaster.
Meta di un klup di Toastmasters International ta pa proveé un ambiente di suporte mutuo i positivo pa siña, unda kada miembro individual tin e oportunidat pa desaroyá komunikashon oral i abilidatnan di liderasko, kual na su turno ta enkurashá konfiansa propio i kresementu personal.

E kordinadó di e trayekto ta Sherwin Pourier, DTM Ferina van der Hoek, ACS/ALB i Fernon Koeiman, ACS/ALB ta e mentornan di klup.
E seremonia di charter a tuma lugá na Aquarius Conference Room, Habitat. E programa a inisiá pa 8or di anochi en punto i tabata bou di guia di maestro di seremonia Christy Cecilia, IP2
Invokashon tabata na enkargo di Malcolm Wilson, TM. Tur presente a kanta himno nashonal di Boneiru i a rindi honor na bandera di Boneiru.

Pa ta miembro di Shoko Advanced Toastmasters Club, e persona mester ta miembro di Flamingo Toastmasters Club i/òf Sentebibu Toastmasters Club i e persona mester a kompletá e distinshon di competent communicator òf nivel 2 di Pathways. Den e reunionnan edukashonal di Shoko Advanced Toastmasters Club e miembronan tin e oportunidat di ehersé proyektonan di komunikashon i liderasko den un forma mas profundo. Toastmasters International su meta prinsipal ta pa ekipá personanan pa ta un mihó komunikadó i un mihó lider den nos komunidat.

E anochi aki a charter (funda) e klup ofisialmente i direktor di Divishon sr. Fernon Koeiman, ACS/ALB a instalá e promé direktiva kual ta konsistí di:

Presidente: sr. Evo Cicilia
Vise Presidente edukashon: sr. Sherwin Pourier
Vise Presidente relashon publiko: sr. Adrian Wijman
Vise Presidente Miembresia: sra. Daisy Coffie
Tesorera: sra. Noritza Rosalia-Martis
Sekretaria: sra. Marugia Janga
Sergeant At Arms: sra Crusita de Palm-Leoneta

Keynote Speaker pa e anochi aki, eks gezaghèber di Boneiru ,sr. Herbert Domacassé, a enfatisá den su diskurso titulá: “The accountable leader” pa nos aktivá nos mes pa por logra nos metanan stipulá. Si nos sigui papia so sin hasi algu nada lo no kambia.

E charter a keda presentá dor di Sr Reynolds ‘Nolly’ Oleana, hefe di Onderwijs, Cultuur en Wetenschap OCW RCN, na e promé presidente di e klup Evo Cicilia (CC). Sr Oleana a enfatisá e importansha pa kompartí konosementu i a urgi tur miembro pa kompartí tur konosementu ku nan haña durante e reunionnan di Toastmaster i pa no keda ku esaki pa nan so.

Presidente Evo Cicilia (CC) a presentá su diskurso inougural unda el a trese dilanti ku ta importante pa kada persona sigui avansá den bida. Despues a sigui diskurso di direktor di Area 5 2019/2020 Ferina van der Hoek (ACS/ALB) I direktor di divishon A 2019/2020 Fernon Koeiman (ACS/ALB), enkurashando e miembronan pa sigui kolaborá den ekipo pa por yega na resultadonan èkstraordinario personal pero tambe pa e klup.
Finalmente presidente Evo Cicilia (CC) a proponé un brindis dediká na Shoko Advanced Toastmasters Club pa inisiá e selebrashon despues di e seremonia.

Durante di e selebrashon diputado Nina den Heyer, a hasi akto di presensia pa felisitá miembronan i direktiva di Shoko Advanced Toastmasters Club. Tabata un anochi hopi ameno unda por a sinti e kombibiensia meimei di tur Toastmaster i invitadonan presente.

Share This
error: Content is protected !!