FAMIA MERCELINA BIBANDO DEN SITUASHON HOPI DEPLORABEL

KRALENDIJK – Famia Mercelina ta pasando den un situashon fastioso i no ta hañando atenshon pa ayudo. Radio Live 99.9 FM a manda un reportero na kas di e famia menshoná, pa tuma nota di e situashon ku nan ta bibando aden. Sigur un situashon ku ta rekerí atenshon urgente. E pareha a papia ampliamente di nan problema i a menshoná ku gobièrnu ta primintí, sinembargo no ta duna un man huntu ku sosialezaken pa yuda. “Nos no por traha debí na nos salu i gobièrnu a bisa ta bai duna ònderstant, sinembargo  nan no a hasié. Tur djaluna nos ta kome pasobra Yona Chirino ta pèrkurá pa nos haña kuminda. E otro dianan nos mes tin ku wak kon hasi pa yega na algu pa pone riba stoma. Durante un bishita na Dòkter Hermelijn, el a tira bista i a tuma nota ku mi no ta pone komo persona ku no por traha debí na mi kondishon di salu. Pues mi no ta riba lista komo afgekeurd i pa e motibu aki mi no ta bin na remarke pa risibí ònderstant. Dòkter Oscar i esun promé kuné a deklará mi persona ku debí na situashon di salu i operashonnan ku mi a hasi, no ta posibel pa mi traha. A hasi tur e proseso pa yega na ònderstant i despues den proseso a stòp esaki,E suidadano di fam Mercelina a menshoná.

Esposa di e hòmber tambe a pasa un proseso kende tabata traha na ‘Coco Beach’ nan a, dun’é un montante di plaka i debí ku e lugá a sera el a pèrdè trabou.

E hòmber a sigui bisa: ”SZW ta bisando pa medio di Yona, kende ta yuda nos, ku mi mester laga pasado i ban di nobo pa kontinuashon. Mi a nenga di bai traha e papel pa logra haña sèn. E motibu ta nan ke traha un karta na hulandes i ami a bisa nan traha e karta na papiamentu. Aki e kos ta pegá awor i si esei sosodé mi por kuminsá haña sèn. Dikon mi no ke bai di akuerdo, pasobra nan ke traha un karta na hulandes pa mi firma i nan lo no bai paga mi e añanan ku a pasa ku nan mester a paga mi. Mi sa ku mi tin derecho pa risibí e sèn di e tempu ku a pasa. Si mi firma awor mi ta pèrdè loke mi mester a haña. Doño di e kas kaminda nos ta biba, a bisa ku e ta deseá pa nos sali for di e kas. E no por drecha e kas i nos no ta pagando, pasobra nos no tin entrada. Diferente kos na e kas ta deplorabel, entre otro e plafònt ta kasi basha den otro kompletamente. E pos ta práktikamente habri parti ariba i holo desagradabel ta sali i drenta e kas. E kos aki ta a-higiéniko i aparte ku nos salu no ta stabil, mester dil ku e situashon aki,”e pareha a konta.

Ámbos ta pasando den situashon fastioso i no tin kos di kome i mester bebe diferente remedi pa sobrebibí. Ta trata di famia Mercelina ku ta biba den Antriol pariba den kaya Trupial. Nan deseo ta pa ayudo, loke nan ta tende hopi ku gobièrnu ta yuda hende, sinembargo e yudansa no ta yega serka nan.

Share This
error: Content is protected !!