KRALENDIJK – E agrupashon musikal di momentu na Boneiru “Fenty Music“ pa un temporada no tabata aktivo ku presentashon pa motibu di e pandemia di Covid-19. Radio Live 99.9 FM a risibí e informashon ku ensayonan a ranka sali pa e promé presentashon den un forma maestral despues di Covid i e agrupashon ta pendiente pa drenta studio di grabashon.

E pandemia di Covid 19 a pèrkurá pa kambionan tambe den e agrupashon. E popular kantante Jurnick Clarenda a informá maneho di Fenty Music ku e no ta forma parti mas di e grupo. Clarenda: “Den pasado ya mi a despedí di e front di Fenty Music komo ku mi a lanta mi propio grupo krioyo “JC & Friends”. Pero despues maneho nobo di Fenty a aserkámi pa bin yuda. Den bida ta yega un momentu kaminda bo mester skohe i esei ta mi kaso. Mi tin un proyekto na kaminda ku JC & Friends i komo doño i kara di e grupo, mi a skohe pa dediká mi tempu na mi propio grupo.

Radio Live99.9 FM mesora a buska kontakto ku Janou Troeman di Fenty Music kende a konta ku enbèrdat Jurnick a menshoná ku e tin algu otro pa bai hasi i a despedí di un dia pa otro.”Nos no a spera esaki i mester a respetá su desishon. Esaki a pone ku mesora maneho di agrupashon musikal Fenty a kuminsá ku búskeda pa un remplasante. Tabatin algun opshon riba mesa entre otro Jordie Felida, Luigino ‘Luis Moka’ Molina i un persona mas. Jordie ta un talento skondí. Un tremendo kantante, sinembargo nos a skohe pa Luigi. Molina lo bai djòin e frònt di Fenty huntu ku Zahid Frans i Gerald Alberto. 

”Nos a papia riba diferente punto i a yega na firmamentu pa Luigi forma parti di Fenty Music. Luigi no ta un deskonosí ku Fenty. Na tres okashon el a partisipá ku Fenty den Festival di Tumba. Dos biaha el a keda komo promé finalista i di tres biaha el a resultá Rei di Tumba kompañá pa Fenty Music. Luigi ta esun ku ta bai pèrkurá pa e ambiente ‘kaya kaya’ durante nos presentashonnan. E ta sigui ku ‘Foyan Boyz’ tambe loke e mes a menshoná i a pone bon kla na momentu ku el a firma pa forma parti di ‘Fenty Music’. Luigi ta un persona ku hopi talento ‘un diamante’ loke nos a tuma nota di dje. Djis un poko guia, e ta bai ta un Luigi nobo ku tremendo aktuashon.

Farandula di Boneiru i moveshon den e mundu aki ta sigui kayente. Radio Live 99.9 FM ta disponé di un informashon ku un integrante mas di agrupashon musikal Fenty Music a gradisí pa e por a forma parti di e grupo, i e lo no ta huntu ku nan mas. Ta trata di e konosido trompetista Philip Bernabela. No ta konosí kiko ta plan pa futuro pa Bernabela, ku el a tuma e desishon pa stòp di forma parti di e agrupashon musikal ku ya pa hopi tempu e ta forma parti di dje.  

E promé presentashon di Fenty Music lo ta dia 25 awor, i riba e dia aki Luigi ta debutá ku nos. Despues nos tin otro presentashon dia promé di ougùstùs durante ‘Taste of Bonaire. Tin mas presentashon pendiente i Fenty Music ta kontinuá ku su presentashonnan despues di ‘Covid-19’.

Pronto nos ta drenta studio di grabashon. Nos tabatin un kantika kla pa graba, sinembargo awor nos mester prepará e kantika pa Luigi kanta pa e bai radio,” Janou Troeman a konta Radio Live99.9FM

E no ta forma parti mas di Fenty…..
E front aktual di Fenty i ‘Luis Moka’ (na man robes) durante ensayo.
Share This
error: Content is protected !!