KRALENDIJK – Farandula di Boneiru i moveshon den e mundu aki ta sigui kayente. Den apenas algun dia e agrupashon musikal Fenty Music ta pèrdè dos integrante. Djis despues di a publiká tokante e kambio den frònt di e agrupashon ariba menshoná, Radio Live 99.9 FM a risibí e informashon di un fuente ku un integrante mas di agrupashon musikal Fenty Music a gradisí di por a forma parti di e grupo, i e lo no ta huntu ku nan mas. Ta trata di e konosido trompetista Philip Bernabela. No ta konosí kiko ta plan pa futuro pa Bernabela, ku el a tuma e desishon pa stòp di forma parti di e agrupashon musikal ku ya pa hopi tempu e ta forma parti di dje. Pero den mesun rosea Radio Live 99.9 FM ta bisa ku kaminda tin huma mester tin kandela. Live 99.9 FM ta disponé di e informashon ku un konosido artista Boneriano i bon amigu di Bernabela ku pa algun siman kaba ta na Boneiru ku fakansi, ta trahando duru i den tur silensio posibel pa forma un agrupashon musikal nobo pa Boneiru. Posiblemente tin mas liña tirá den e reda di Fenty Music. Djayabanda tambe e konosido Ron Martis sorpresivamente a bandoná e frònt di agrupashon musikal Buleria na Aruba i ta na kaminda pa bin establesé su mes aki na Boneiru. Ingridientenan tin ku bai weya pa e kuminda haña sabor. Grandinan ta bisa ku tempu te mihó maestro. Pues aparte ku e kantante Jurnick Clarenda a bandoná Fenty Music, awor un trompetista tambe ta move for di e agrupashon musikal ariba menshoná.  

Hmmmmmm…………. tin un kos ta kushinandoo……..
Share This
error: Content is protected !!