KRALENDIJK – E dianan aki por a skucha hopi den media tokante limpiesa den bario pero tambe depositamentu di sushi di forma ilegal den mondi. Esaki ta algu ku konstantemente ta tuma lugá pa hende nan lokal mes i/òf stranheronan. Sushi di kas, sushi di konstrukshon, sushi di negoshi i hopi mas ta wòrdu depositá tur dia den mondi di forma ilegal.

Suidadano Herbert ‘Lelolai’ Winklaar ta di opinion ku instansianan konserní mester aktua riba tepnan ku ta wòrdu duná pa suidadanonan tokante tiramentu di sushi di forma ilegal den mondi. E mes a pasa den un eksperensia no muchu agradabel i a keda desapuntá na momentu ku el a duna tep. T’e asta el a disidí ku e no ta yama mas ora ku mira hende basha sushi den mondi.

Winklaar: “Algun luna pasá mi a mira kon un pikòp kargá ku sushi den baki tabata bayendo direkshon di Yato Bako. Mi tabata sigur ku e hendenan aki kier a basha sushi den e mondi. “Eybanda no tin lèntfel”, Winklaar a bisa. El a yama polis pa duna e tep di bashamentu di sushi di forma ilegal i asta a kue number di e vehíkulo. Ora mi a yama warda di polis, nan a bisami ku ta Selibon mi mester yama. Sentral di polis ta bisami ku nan no por hasi nada.

Winklaar a bira yama Selibon, pero pa su sorpresa e señora na liña ta kontestami ku ta ofesina di Toezicht en Handhaving mi mester yama. “Ni pa e señora bisa mi ku e mes lo sigi ku e pasonan i yama e hende nan ei pa mi. Na unda nos ta bai? Unda nos ke yega? Bo ta hasi esfuerso, anto e instansia i outoridatnan mes no ta hasi nada. Asina nan a mandami di kashi pa muraya mientras e porko a basha su sushi te kore bai. “Awel for di e dia ei mi a disidí ku mi no ta yama i bisa nada mas ora ku mi mira kosnan ilegal ta tuma lugá.

Share This
error: Content is protected !!