KRALENDIJK – Ku skor di 2-1 den prolongashon di e promé partido Torneo Kopa FFB selebrando 60 aña di e federashon di futbòl di nos isla, s.v. Uruguay ayera nochi den Stadion di Playa, ta retirá e kampionnan di s.v. Real Rincon di Rincon fo’i dje torneo estilo “dal saka”.

Ku e viktoria aki, s.v. Uruguay ta sigui den e torneo i s.v. Real  Rincon ku e derota ta keda eliminá di e torneo. S.V. Uruguay ta sigui pa e siguiente buèlta i ta topa ku ATC dia 22 di yüli 2020.

Ta bon pa menshoná ku un bon públiko a presensia e partido. Despues ku futbòl tabata ketu basta largu pa motibunan ya konosí di Covid-19, un bon públiko a presensiá e partido. Un total di 614 fanátiko a paga pa mira e partido, di kua 438 adulto, 104 mucha i 72 fanatiko 60+. E kantidat aki tabata muchu mas tantu mirando tur esnan ku e anochi aki a drenta komo invitado. Ta spera tambe ku e partido entre Atlétiko Flamingo i Vespo djárason awó, lo hala basta hende hiba stadion pa mira e partido aki ku tambe ta primintí di bira otro tremendo partido di e torneo.

Ta di lamentá si ku e torneo no a kuminsá muchu bunita ya ku  tabatin dos karchi kòrá inesesariamente den e partido pa Rilove Janga i Luigi Crestian. Tabata un partido tambe ku Rèfri Cassius Coffie a dirigí su último partido di FFB, retirando asina tambe ofisialmente komo rèfri.

Ta bon pa menshoná ku e partido aki a parti na dos pa sosiegu reglamentario sin gol, 0-0 pues. E di dos mitar, na di 57 minüt John Salgado ta anotá pa s.v. Uruguay bai den bentaha di 1-0. Na di 75 minüt di e partido, Jairo Clarenda ta anotá pa s.v. Real Real Rincon empatá e partido 1-1. E partido ta finalisá den empate i ta bai den prolongashon di 2 bia 15 minüt. Na di 106 minüt Jurvel Clara ta anotá e gol di viktoria di 2-1 pa s.v. Uruguay, ya ku despues di esaki e partido no a konosé mas gol.

S.V. Uruguay ku esaki ta bai ku e viktoria pues di 2-1 i ta sigui den e torneo, mientras ku e kampionnan di s.v. Real Rincon ta kai afó di e torneo.

Share This
error: Content is protected !!