KRALENDIJK – Awe nochi e torneo di futbòl Kopa FFB 2020 selebrando 60 aña di e federashon di futbòl di nos isla, ta sigui den Stadion di Playa, esaki ku e kandela entre Vespo di Rincon i Atlétiko Flamingo di Nikiboko. Esaki ta e di dos partido di e torneo Kopa FFB, despues ku esaki a inisiá djadumingu último ku e partido entre e kampionnan di Real Rincon i Uruguay di Antriòl Pariba ku a gana e partido ku skor di 2-1.

E di dos partido di e torneo awe nochi, ta primintí di bira otro tremendo partido di e torneo ku dos ekipo ku e deseo di gana e partido i keda den e torneo i no pèrdè kai afó.

Awe nochi ku e partido entre e ekiponan Atl. Flamingo i Vespo, un grandi mas lo kai i keda retirá di e torneo. Awe nochi sea ta Atl. Flamingo o Vespo lo kai afó ya ku e torneo ta unu estilo “dal saka”, loke ta nifiká ku e ekipo ku pèrdè ta kai afó, e ekipo ku gana ta sigui. Mester yega na un ganador. Den kaso ku tin empate na final di e partido, ta bai prolongashon di 2×15 minüt i despues si ainda tin empate, lo tira pinalti pa yega na un ganadó.

Hopi interesante porsierto, loke ta hasi kada partido unu na nivel, ya ku tur dos ekipo ke bai ku e viktoria. Tur ekipo ta bin hunga futbòl na nivel, demostrando futbòl di klase pa e fanatikada ku ta paga pa mira e partido.

E partido djawenochi pues, tei bira un tremendo partido ku abo komo e bon fanátiko di e deporte di futbòl no por pèrdè. Wak pabo tei foi tempran pabo no pèrdè nada di e partido aki. Entrada pa mucha i 60+ ta solamente $2,-, adulto ta paga solamente $3,-.

Éksito na e ekiponan den e partido i den e torneo.

Share This
error: Content is protected !!