KRALENDIJK – Resientemente Bonaire Lions Club a eligí su direktiva pa e aña leonístiko 2020-2021 bou di presidensia di Edelmira Marten-Carolina ku a keda reeligí komo presidente i ta bira e di 59 presidente.

Edelmira Marten-Carolina den su spich komo presidente entrante a indiká ku e ta gradesido pa e konfiansa pon”é den su persona un aña mas pa dirigí e klup di tantu balor pa komunidat.

E aña ku a pasa tabata un aña otro for di tur aña. Un aña ku un pandemia ku a sorpresá mundu kompletu i ku tabatin su influensianan negativo tantu sosial komo ekonómiko.

Un aña leonístiko ku a premirá di bira un aña ku hopi aktividat riba diferente tereno. Apesar di esei por wak bèk riba algun meta ku a realisá manera e spònsermentu anual di un deportista pa partisipá den un torneo di baseball internashonal, yudansa ku limpiesa na Hospice Kas Flamboyan. Den Regatta a logra hasi algun mucha di Fundashon Kuido pa Oido i Bista , ku tambe ta un grupo di enfoke di Lions, kontentu ku entrada pa e atrakshonnan ku tabatin den parke Wilhelmina. Den kuadro di salú tabatin un kaminata den naturalesa ku na final tèst di suku, tambe a sostené Special Olympics ku nan Walk A Thon anual tantu ku ‘manpower’ komo un kontribushon pa e famoso sòpi pa na final.

E pandemia tabatin su banda positivo tambe mirando ku un meta ku tin diferente aña pero ku no ta logra, e biaha aki si a logra. Ta e forsa ku a uni entre diferente klup di servisio, den e kaso aki Kiwanis Club i Rotary Club huntu ku Bonaire Lions Club , pa hasi un radiotòn. Esaki pa a kontribuí ku sèn i komestibel pa Voedselbank i Voeding op school ku ta distribuí kuminda pa famianan den nesesidat i den e kaso akí tambe esnan afektá pa e krisis ku a surgi. E tabata un proyekto pensá den un tempu hopi kòrtiku ku a bai kontra di e lema ku ‘sòpi purá ta sali salu’. Den e kaso akí a logra den 4 ora kolektá kasi $16.000 i sin konta e paketenan di komestibel tambe ku a entregá.

Dia 2 di febrüari durante di charternight ku Bonaire Lions a kumpli 58 aña, a eligí e POTY (person of the year) di 2019 ku ta Sr. Frensel Celestijn i a hasi uso di e oportunidat pa hasi un donashon na e agrupashon musikal di hóben FMK. Despues Corona virus a bin aden i a paralisá tur proyekto. Otro meta tabata pa reklutá miembro nobo. Esaki tambe ta otro logro. Bonaire Lions Club ta orguyoso di anunsiá ku Ariadna Timp i Pedro de Jongh awor ta forma parti di e famia leonístiko.

Presidente Edelmira a finalisá i ta yama danki na e direktiva saliente, otro ‘lionnan’ i ‘partnernan in service’ ku den un tempu difísil a hasi nan máksimo esfuerso pa tòg por a funshoná i ku a sòru pa apesar di tur kos logra laga Lions su nòmber sigui resoná. Alabes ta bai un felisitashon na e direktiva entrante ku sigur lo duna kontinuashon na e bon trabou di Bonaire Lions Club manteniendo su lema: ‘We serve better when we serve together’.

El a terminá su spich yamando danki na e direktiva saliente sperando di por konta ku koperashon di kada un miembro pa asina sigui realisá i metanan i alabes a felisitá direktiva nobo i ta sigur ku lo duna kontinuashon na e bon trabou di Bonaire Lions Club.

Ku e lema di Bonaire Lions Club den mente: ‘We serve better when we serve together’.

Share This
error: Content is protected !!