KRALENDIJK – Elvis Soleana a konta na Radio Live 99.9 FM, loke a sosodé ku su tata. “Un remedi teribel a daña i kambia bida di mi tata. Mi tata tabatin e problema di ‘hernia’. El a bai Aruba i tabata risibí tratamentu. Despues nan a kambia di dòkter na Aruba, esta un otro dòkter a kuminsá atendé ku mi tata pa su malesa di ‘hernia’. Aki tur kos a kambia i nan a bisa ku mi tata tin ‘parkenson’. Nan a dun’é ‘Clozapine SDZ’ di 25 miligram. Ta trata di un remedi ku no ta korekto i a afektá otro kos. ‘Clozapine’ ta un remedi ku no ta usa na Merka. Esaki debí ku e no ta bon. Solamente e parti di Europa ta aprob’é. Si tabata na Merka a sosodé loke a sosodé ku mi tata, lo por a demanda nan. Na Hulanda no ta hasi nada ku e kos aki. Nan ta na altura ku e ta un remedi inkorekto i ta sigui uz’é kousa daño na hende. Nan ta papia aktualmente ku mi tata tin parkenson, i su edat ta haltu loke ta hasi e situashon fastioso.

Mi a bai ofisina di keho sinembargo mi ta tuma nota ku no tin masha kos ta tuma lugá. E remedi ku nan a dun’é a daña hopi kos den su kurpa i dòkter ta bisa e mester tuma e remedi. Awor mi tata ta bai kas di kuido. Na Boneiru mester tin mas pasenshi pa loke ta trata hende di edat. Ta trata nan malu, pasobra nan ta di edat avansá. Ambulans a buska mi tata na kas i e tabata den hospital sin kome nada i bebe nada. Mi a yega Hospital i nan a bisa a chek tur kos i mi tata por bai kas. Kon ta posibel ku a bisa e por bai kas siendo e no ta kome i bebe pa e ta stabil,” Soleana a bisa tokante situashon di e tata kende ta hospitalisá.  

Share This
error: Content is protected !!