Kralendijk – Ta hopi sakrifisio a hasi durante añanan ku pa awe por selebrá sesenta aña di nos futbòl. P’esei diputado enkargá ku deporte Pablo James Kroon na nòmber di gobièrnu di Boneiru a felisitá direktiva di FFB ku e bon trabou ku nan ta ehersé durante añanan.

Boneiru a lanta su propio federashon di futbòl ku a haña e nòmber di Federashon di Futbòl Boneriano na luna di mei di aña 1960. E promé presidente di e federashon tabata Hose Frans (q.e.p.d.). Den transkurso di añanan e federashon a konosé diferente presidente ku a organisá kampionato. Ludwig Balentin na e momentunan aki ta presidente di FFB for di aña 2011. Na aña 2014 bou di presidente di Balentin, Boneiru a bira miembro ofisial di Concacaf. Na aña 2018 Balentin a sinta ku presidente di FIFA Gianni Infantino, pa kuminsá e prosesonan pa asina Boneiru por bira miembro di FIFA. Na apertura di e torneo pa selebrashon di sesenta aña FFB presidente sr Ludwig Balentin a trese dilanti ku direktiva di FFB ta sumamente orguyoso di por forma parti di e sesenta aña di futbòl i ku esaki no ta nada fásil,mirando ku tur hende no ta keda kontentu ku tur kos. Mester pone e meta dilanti kual ta pa sirbi e deporte futbòl, ta p’esei e direktiva tei, pa asina tantu grandi i chikitu por gosa di e deporte.

Diputado enkargá ku deporte Pablo James Kroon na nòmber di Gobièrnu di Boneiru a felisitá direktiva di FFB ku e bon trabou ku nan ta ehersé mirando ku ta hopi sakrifisio a hasi durante añanan ku pa awe por selebrá sesenta aña di nos futbòl. Diputado a deseá tur ekipo éksito i pa laga e torneo bai den un forma deportivo i esun ku gana esei ta kampion i pa kuminsá prepará mirando ku futbòl na Boneiru tin hopi kos positivo na kaminda.

Share This
error: Content is protected !!