KRALENDIJK – Djarason atardi algu despues di 4’or, a sosodé un aksidente riba waf Nello Craane (waf di Sùit) na momentu ku un kompania lokal ku ta atendé ku transporte di karga tabata deskargá konteiner. Shofùr di un trèker pa motibunan deskonosí a kai for di e trèker ku e tabata manehá i a bai resultá bou di e vehíkulo pisá aki. E trèker pa un motibu òf otro a pasa riba dje. Mesora a bati alarma i tantu polis komo ambulans a presentá rápidamente riba waf. A transportá e hòmber aki den un situashon delikado i ku urgensia pa hòspital. Na hòspital mesora a bai kuné kamber di operashon kaminda a trata shofùr di e trèker aki ku a sufri leshonnan serio rònt su kurpa. Di informashon ku Notisia Live99 ta disponé di dje ta indiká ku shofùr di e trèker aki lo mester a sali for di e kabina di e trèker pa bai hak un konteiner i a slep kai ku e konsekuensia ya menshoná. Su situashon ta di atenshon i a wòrdu transportá pa Kòrsou i ta den e departamentu di kuido intensivo na hòspital CMC. Ta trata di un trahadó di e kompania Don Andres NV.

Share This
error: Content is protected !!