KRALENDIJK–E ekipo di Vespo di Rincon, djárason anochi ta eliminá Atlétiko Flamingo di Nikiboko ku skor di 3-0 fo’i dje torneo Kopa FFB selebrando 60 aña di e federashon di futbòl di nos isla.

E promé mitar Vespo a hunga ku bientu na fabor i Atl. Flamingo ku bientu kontra. Tabata un partido si ku lamentablemente atrobe a konosé diferente (4) karchi kòrá meskos ku tabata e kaso ku e promé partido (2) di e torneo entre Real Rincon i Uruguay.

Un bon públiko a presensia e partido aki, pa ta eksakto un total di 1056 fanátiko a paga pa mira e partido, kibrando e “record” di 614 ku a paga pa mira e promé partido, partido djadumingu último entre Real Rincon i Uruguay. Tabata 805 adulto, 185 mucha i 66 60+ ku a paga pa mira e partido, sin konta esnan ku no ta paga pa mira e partidonan. Tabata tin tambe tremendo presentashon di grupo di brasbènt The Boyz ku a animá e públiko presente.


Na momentu ku e partido a parti na dos djárason ultimo pa sosiegu, Vespo tabata dilanti 1-0 ku gol di Papa Isenia anotá na di 33 minüt di e partido.
Por sierto un bunita tiru liber kua resultá den e promé gol di e partido. E di dos mitar, Vespo ku bientu kontra ta anotá na dos okashon mas ku golnan di Raydolf Felix i Jursen Trinidad na di 63 i 65 minüt di e partido, pa finalmente Vespo bai ku e viktoria di 3-0 riba Atlétiko Flamingo, loke sigur hopi no a spera. Ku esaki ya ta dos ekipo grandi ku a keda eliminá di e torneo aki ku ta Kopa FFB selebrando 60 aña di FFB.


Rèfrinan ku a dirigí e partido djárason último ta Bryan Virginie ku a dirigí un tremendo partido, asistí na banda pa Amos Melaan i Benjamin Henricus ku Chal Thomas na mesa.

Riba potrètnan e rèfrinan ku a dirigí e partido, e ekiponan, rèfri prinsipal papiando ku e kapitannan promé ku wega, kapitannan ta deseá otro éksito promé ku wega i tambe un bista di e gran públiko ku a presensiá e partido.

Share This
error: Content is protected !!