KRALENDIJK – Awe djabièrnè mainta algu despues di 9’or un grupo di spesialmente trahadónan di BOPEC a manifestá for di Parke Tului na Playa Pabou, i bai e patio di ofisina prinsipal di gobièrnu tambe yamá Bestuur kantoor. A organisá e manifestashon pasífiko ku un solo meta: pa demonstrá union apoyo i sosten pa tene BOPEC habrí.

Promé ku a inisiá e marcha di manifestashon, algun persona a papia tokante e meta di e momentu i ku nan ta bai entregá un manifesto na gezaghèber Edison Rijna. Trahadónan di BOPEC huntu ku otronan a marcha for di e sitio ariba menshoná pasando den kaya grandi den direkshon kontrali. Polis tabata na diferente skina di kaya pa dirigí tráfiko. Durante marcha nan a kanta himno di Boneiru na algun okashon i menshoná ku motibu di e manifestashon ta pa BOPEC keda habrí.

Momentu ku nan a drenta kura di BC, ya gezaghèber Rijna tabata sperando nan yegada pará na pia di trapi. Norwin ‘Nochi’ Willem di USIBO a dirigí palabra i a menshoná ku ta tuma 1 minüt di silensio, esaki relashoná ku fayesementu di kompañero Etienne Coffy. Un persona hopi konosí i kerí den komunidat. Seguidamente Nochi a dirigí algun palabra na gezaghèber i despues a pasa palabra pa Gerold Bernabela di FEDEBON, Gabriel Pourier DI BPWU i Remy Ellis ku ta un trahadó di BOPEC. Entre otro nan a menshoná ku nan deseo meskos ku tur otro presente ta pa BOPEC keda habri. “Nos ta apresiá gezaghèber su atenshon. Nos tin ku sigui demostrá ku nos lo hasi tur posibel pa BOPEC keda eksistí. E tempu malu di awor nos tin ku hasi esfuerso pa pas’é pa nos kontinuá ku BOPEC. Nos tin konfiansa ku huntu nos por esaki.

Hulanda a bisa ku BOPEC no por keda eksisti, i nos ta deseá pa gezaghèber pèrkurá pa e keda habri, kontrali na loke Hulanda ta bisa,” tabata entre otro loke a keda menshoná.

Gezaghèber Rijna na su turno a bisa ku e ta hiba e mensahe, pasobra nos ke pa BOPEC keda habrí i kaminda e ta. “Mi tabata i ta sigui hasi esfuerso pa BOPEC keda eksistí. No ta di awor, pero for di kuater aña pasá mi a kuminsa hasi esfuersonan pa BOPEC, bula bai Hulanda i reuní entre otro tokante e asuntu di Conoco Phillips, toubot ets. Boso hasi boso parti ami ta hasi dimi,” gezaghèber Rijna a bisa. Despues Mavis Abrahams a lesa e manifesto kompletu den presensia di tur presente. Seguidamente a presentá 2 yu di un empleado i esun muhé Isabella Soleana a dirigí algun palabra. Ta trata di un mucha muhé di 9 aña. Despues nan a entregá e karta na gezaghèber ofisialmente.

Share This
error: Content is protected !!