KRALENDIJK–E ekipo di futbòl di Nort Saliña ku ta S.V. Estrellas, djadumingu anochi den Stadion di Playa, ta gana di Arriba Perú ku skor di 2-1 i asina tambe eliminá e peruanonan di Kopa FFB, despues di tabata tras 1-0 den e partido.


Un bon públiko ku a haña kaminda bèk pa futbòl a presensiá e partido.
Un total di 726 fanátiko a paga pa mira e partido, di kua 562 adulto, 124 mucha i 50 fanátiko riba 60 aña. Esaki sin konta esnan ku no ta paga pa mira futbòl i tampoko esnan riba muraya ku tambe tabata bastante ayera nochi.


Pa loke ta e partido, tabata Arriba Perú ku ta bai dilanti 1-0 den e partido, esaki ku gol di Esteban Berdugu na di 36 minüt di e partido.
Na di 41 minüt Beek Venlo Charles ta anotá pa Estrellas empatá e partido 1-1, skor tambe ku e partido a parti na dos kuné pa sosiegu.
Di dos mitar di e partido tabata Mayron Serberie na di 52 minüt di e partido ta hasi e partido 2-1, anotando tambe e gol di viktoria ya ku despues di esaki e partido no a konosé mas gol no opstante e diferente oportunidatnan ku a presentá. E ekiponan despues di esaki a sigui poné preshon buskando mas gol pero no ta logra. E partido ta finalisá den viktoria pa S.V. Estrellas di Nort Saliña ku ta pasa pa e siguiente buèlta di ganadornan, miéntras ku Arriba Perú hungando un tremendo partido ta keda eliminá di e torneo Kopa FFB selebrando su 60 aniversario.


Riba potrètnan e rèfrinan ku a dirigí e partido, e ekiponan i outornan di e golnan di e partido djadumingu último.

Share This
error: Content is protected !!