KRALENDIJK – Un suidadano kliente di Flamingo TV a aserká Radio Live 99.9 FM relashoná ku un situashon ku segun e no a bai korekto. Ta trata di un supsidio ku Flamingo TV, TELBO i DIGICEL a risibí di Hulanda, pa rebaho riba e sistema di pago pa Internèt. Ta trata di un deskuento di 25 dòler pa usuarionan fiho di internèt. “Gobièrnu di Hulanda a anunsiá ku entrante luna di mei te luna di desèmber 2020 ta bai duna un deskuento di 25 dòler tur luna, pa esnan ku tin konekshon di internèt fiho. Esaki tin di aber den kuadro di medidanan di alivio pa islanan BES relashoná ku e impakto di ‘Covid-19’. Segun e suidadano, Flamingo TV a tene un konferensia di prensa di último ora pa menshoná ku no tin klaridat kon ehekutá e deskuento pa Internèt. Nan a pidi pa usuarionan tene poko pasenshi i kontinuá ku e pago normal komo ku ta den deliberashon ku ministerio di asuntunan ekonómiko i medio ambiente, kon pa apliká e medida. Sin un dekreto ministerial no por a duna ningun deskuento. Pero nunka mas a bolbe pa informá ku a keda kla pa ehekutá e deskuento. Solamente esnan ku bai paga personal na ofisina ta haña e informashon ku nan tin ku paga ménos. Esnan ku ta paga pa medio di banko no tin niun informashon tokante e deskuento. E informashon di e deskuento no a yega na konosementu di klientenan, pa nan ta na altura ku mester paga ménos sèn fin di luna. Ya tin algun luna ku e pago ta kontinuá normal via ‘standing order’. Segun ami Flamingo TV mester a informá e kliente ku ta paga via banko via di meil of bini bek prensa pa informá ku a keda kla tokante e deskuento,” e kliente a bisa.

Radio Live 99.9 FM a tuma kontakto ku Patrick Dowling, mènedjer di Flamingo TV tokante loke e kliente a menshoná.

“E supsidio ta kla i e kliente ta haña un deskuento di 25 dòler deskuento tur fin di luna. Esaki a kuminsá for di luna di Mei i ta kaba desèmber 2020. Esnan ku ya a paga algun luna e montante kompletu, tin un kantidat di sèn disponibel di loke nan a paga ku ta di mas. Mester tuma kontakto ku Flamingo TV i lo atendé ku nan pa deskontá loke nan tin ku paga fin di luna, loke ya nan a paga ku ta di mas. E deskuento ta solamente riba e parti di Internèt. Ta bon pa klientenan ku tin un ‘standing order’ na banko, pa tuma kontakto ku bo banko pa hasi e kambio pa fin di luna ménos sèn pasa pa Flamingo TV. Pa tende e montante korekto, ta bon pa tuma kontakto ku ‘Customer Service’ di Flamingo TV na 717-8512, loke nos ta apresiá,” Dowling a bisa.

Share This
error: Content is protected !!