KRALENDIJK – Un suidadano ta ekspresá tokante e situashon relashoná ku habrimentu di frontera. “A habri frontera i a habri porta mesora pa COVID–19 por drenta Boneiru.

Awó te momentu pa gezaghèber Edison Rijna i e tim di salubridat públiko sali den medionan sosial, pa pidi suidadanonan mantené distansha sosial i entre otro labamentu di man.

Na momentu ku a suavisá e medidanan i habri frontera pa turista, e peliger ta bira mas grandi pa e suidadano di e isla. Mas aun ku resultá ku algun tipo di tèst rápido pa 35% no ta konfiabel segun media riba Internèt. E tèst mas konfiabel ta esun di sanger i esaki tambe tin bia ta bai robes. Tèst ta sali negativo i despues den segundo buèlta ta resultá positivo.

Hendenan den supermarket, tienda òf loke sea ta para muchu pegá riba otro i a haña e impreshon ku tur kos ta safe, kaminda awó e peliger ta mas grandi,” e suidadano a menshoná.

Hospital

“Na hòspital tin un situashon ku mi no ta komprondé kon e direktiva òf direktornan ta funshoná.

Aki e chèns pa kontagiá hende ta mas grandi i mas aun bo trahadónan. Na entrada pues pafó, mester tin un baki ku awa i habon p’abo laba i desinfektá bo man promé ku yega serka e bewakernan i personal tras di bali pa tuma un pas pa por drenta hospital.

Bo ta kana drenta ku man shushi òf kontaminá bai paden bai pega bakteria na e pasnan apesar ku nan ta limpia nan despues. Aki bo a ekspon’é  e personal kaba ku bakteria i posibel vírùs. Mas ainda e persona ku ta bini spesialista no a laba su man apesar ku no ta dun’é man, e ta mishi ku porta, bali di sita, bali di spesialista kaminda asistente ta traha i kaminda otro tambe ta bin pone nan man, papel i mas. Pues fo’i entrada mester tin algu pa laba i desinfektá bo man. Mas paden tambe promé ku bo bai e spesialista òf bali, tambe mester tin un kaminda pa laba bo mannan. Tur e despenser nan ku ta kologá na muraya kasi ta bashí, pues or abo bai bo no por desinfektá bo man. Ora ba yega na bo outo òf medio di transporte, bo man ta mishi ku porta, stür, ku tambe por hasi daño. Tin den outo un bòter ku desinfektante por yuda limpia bo man, stür i kaminda bo ta mishi.

Ku e artíkulo aki mi ke kontribuí na hala atenshon di outoridatnan pa asumí nan responsabilidat atrobe i hala atenshon di hospital pa e situashon i hala atenshon di negoshinan pa sigui mantené alerta i pidi distanshamentu fo’i otro i kumpli ku reglanan ku outoridatnan ta eksigí di nos, sinembargo nos tambe di nan,” e suidadano a bisa.

Share This
error: Content is protected !!