KRALENDIJK – Nos amigu Ettienne Coffy a bai nos dilanti djaweps último. Un doló enorme loke a sosodé, i ta trata di un persona hopi kerí den komunidat. Promé ku manifestantenan a dirigí palabra na gezaghèber di Boneiru Edison Rijna, djabièrnè mainta, a tuma un minüt di silensio na memoria di Ettienne. Na mes momentu tabatin un parada di trùk, dunando honor na e defuntu.

Novèmber 2019 Ettienne i ami huntu ku algun persona tabata presente na Kolegio Rayo di Solo durante klousura di siman di lesa buki. Nos tabata presente na e skol, pa splika i kore ku e muchanan un buèlta riba tereno di skol. E meta tabata pa e muchanan topa trùk i motosaikel,  i kon nan ta funshoná. Ettienne tabata ku trèker di Don Andres i ami ku motosaikel i algun amigu. Mi a saka ‘Selfie’ huntu kuné pa mi skirbi algu, e kos ku mi gusta di ‘Nos a Topa’. Esaki ta loke mi a skirbi.

“NOS A TOPA”

Ettienne Coffy bon amigu di pasado. Nos a traha huntu na Busi Bona Bouwcombinatie i Beton Cement Industrie. Algun di e nòmbernan ku Anton Sieverding a duna su kompania den pasado. Ettienne i ami tabata entre otro manehá trùk i forklift. Mi a siña hopi serka Ettienne. Un maestro den manehá trùk ku treiler su tras. Loke e ta hasi awor ta mas fásil, kompará ku loke nos tabata hasi den pasado pa Stieverding i e sekretaria Rigna Angila i Claris Trenidad. E tempu aya tabata ku trùk nan spil kibra, stür ku hopi ‘speeling’ i mas. Si bo por a manehá e trùk nan aya, bo por kore tur otro kos manera ta bisa. No pa broma, sinembargo mi tin stèmpel den reibeweis pa por manehá tur vehíkulo riba kaya. No solamente stèmpel, sinembargo bon eksperensia ku nan. Dragrace ku motosaikel ta otro kaso. Mi no ta bisa ku Boneiru no tin bon shafer di trùk, trèker i treiler, sinembargo mi konosé Ettienne i e tin un abilidat enorme pa hasi hopi maeobra ku trèker i trùk, ku ta largu ku diferente djòin tras di otro. No un trùk ku solamente un treiler pegá su tras. E tabata hasié ku un trùk ku dos diferente treiler pega su tras, riba waf momentu ku tabata deskarga barku di semènt. Hende ku konosementu di esaki sa kiko mi ta referí na dje. Ta algu hopi kompliká. Bon persona sinembargo no pone rabia, apesar ku su ko’i rabia no ta tras di porta. Nos a topa na Kolegio Rayo di Solo durante klousura di siman di lesa buki. Ami tabata presente ku algun amigu ku motosaikel i Ettienne ku trùk di Don Andres, e kompania ku e ta laborá pe. (E artíkulo ta skirbi 15 di novèmber 2019)

Momentu ku mi a tende ku algu a sosodé ku Ettienne, e kos un bes a shòk mi. Mi a resa na Señor pa yud’é, sinembargo el a deseá pa tum’é den su Reino. Pas na su restunan, forsa na famia, kolega di Don Andes NV, amigu i amiganan. Entiero ta tuma lugá djadumingu awor aki na Boneiru. Dios dun’é un lugá den su reino i trankilisá esnan ku a keda tras ku doló den nan kurason.  

Share This
error: Content is protected !!