YOUNG BOYS A ELIMINÁ VITESSE 3-2 FO’I KOPA FFB 2020

KRALENDIJK – Djabièrnè último 17 di yüli 2020, partido nr 3 di e torneo 60 aña di FFB, tabata e partido entre e ekiponan di S.V. Vitesse di Antriòl Pabou i S.V. Young Boys di Nort Saliña. Tabata un partido ku a konosé un total di 5 gol, di kua Young Boys a bai ku e viktoria di 3-2 riba Vitesse.


E ekiponan Vitesse i Young Boys a sa di hala bastante hende hiba stadion di Kralendijk pa mira e partido. Un total di 676 fanátiko a paga pa mira e partido, di kua 497 adulto, 146 mucha i 33 fanátiko riba 60 aña.

E promé mitar di e partido Young Boys a hunga ku bientu na fabor i Vitesse ku bientu kontra. Tabata e ekipo di Young Boys ku a bai dilanti 1-0 den e partido, esaki ku gol madrugador di Burnangel Gerly na di 2 minüt di e partido. Na di 15 minüt Young Boys ku a sigui poné preshon riba e arko di Vitesse, ta amplia bentaha na 2-0 ku gol di Burnangel Gerly ku a hinka su di dos gol di e partido. Vitesse a sigui buska e gol di kòrta bentaha i tabata Rendy Polonio na di 27 minüt di e partido, ta anotá pa Vitesse kòrta bentaha na 1-2, skor tambe ku e partido a parti na dos kuné pa sosiegu.
E di dos mitar Vitesse a subi tereno di wega desidido i na 56 miunüt di e partido ta haña pinalti, di kua Giovanni Janga ta tira ku éksito pa empatá e partido 2-2. Na di 79 minüt di e partido, Young Boys ta hasi e partido 3-2 ku gol di Xemion Celestijn. Despues di esaki e partido no a konosé mas gol i ta finalisá den viktoria di 3-2 pa e hóbennan di Nort Saliña ku ta Young Boys.
Ku e resultado aki Young Boys ta sigui pa e siguiente buèlta di e torneo, Vitesse ta eliminá di e torneo.

Un danki di parti FFB ta bai na e fanatikada di ámbos ekipo pa presensiá e partido i apoyá e ekiponan. Rèfrinan ku a dirigí e partido aki tabata Franson Melaan, asistí na banda pa Kòki Winklaar i Geoffrey Angela.
Despues di e partido aki e torneo a sigui ayera nochi di kua nos lo bini ku e resultado den otro edishonnan e siman aki.

Riba potrètnan e ekiponan, rèfri ta papia ku e kapitannan promé ku e partido, e kapitannan ta deseá otro éksito i outornan di e sinku golnan di e partido.

Share This
error: Content is protected !!