KRALENDIJK – Fundashon Lesa ta Dushi ta masha kontentu pa anunsiá ku e aña akí un bes mas nan lo bai entregá 12 kashi di buki, yená ku buki nobo (na Papiamentu i Hulandes) na diferente krèsh i akohida pa mucha na Boneiru. For di aña pasá Fundashon Lesa Ta Dushi a hasi entrega di 12 kashi di buki na diferente krèsh i akohida.

E aña aki e proyekto por wòrdu realisá ku sosten finansiero di “Wings of Support”, ku kua Fundashon Lesa ta Dushi tabata tin un reunion na luna di febrüari último pa presentá e proyekto. Wings of support ta un inisiativa independiente di empleadonan di grupo di KLM. Nan meta ta pa yuda hóbennan na lokalidatnan ku KLM ta bula, pa asina fasilitá edukashon, akohida i yudansa médiko. E proyekto di kashi di buki a ser aprobá i Fundashon Lesa Ta Dushi a risibí un montante di 5000 Euro pa realisá e proyekto akí. Dos aña konsekutivo lo bai entregá 12 kashi ku buki.

E kashinan mes lo wòrdu trahá atrobe dor di studiantenan di MBO klasnan SMG2.1, SMG2.2 en AVOK3.1., sekshon di karpinteria. Durante e lèsnan akí, e studiantenan ta siña masha hopi i nan a hasi un tremendo trabou aña pasá. Ademas lo usa e sosten finansiero pa hasi donashon di mas buki nobo na krèshnan i akohidanan di mucha ku a risibí un kashi aña pasá. Fundashon Lesa Ta Dushi ta sumamente agradesido di por sigui ku e proyekto ku sosten finansiero di Wings of Support i kolaborashon di studiantenan di SGB. Fundashon Lesa ta Dushi ta keda promové i motivá lesamentu bou di nos hóbennan, pasobra “Un mucha ku ta lesa, ta bira un adulto ku ta pensa”.

Share This
error: Content is protected !!