KRALENDIJK – Resientemente Kuerpo Polisial di Boneiru a publiká vakatura pa interesadonan pa bira polis na islanan BES. Tabata tin dos seshon di informashon ‘Live’ pa medio di ‘Facebook’ kaminda e reakshon tabata grandi. Tantu hende hòmber i hende muhé, hóben i hende di mas edat por a solisitá pa okupá e funshon di polis. Por a solisitá te ku 10 di yüli 2020. Ta promé biaha ku un kantidat masal di hende a reakshoná kaminda por konfirmá ku mas di 300 hende a solisitá pa bira polis. Radio Live 99.9 FM por a komprondé ku no ta solamente personanan bibá na Boneiru a solisitá, sinembargo tabatin interes for di Hulanda, Sürnam, Aruba, Kòrsou i Sint Maarten. Mirando ku islanan BES tin mihó kondishon di trabou i salarial a pone ku tabatin hopi interes djafó. For di e kantidat ariba menshoná, lo skohe 20 persona, kendenan lo sigui e skol di polis pa traha na islanan ‘BES’. E estudio pa bira polis ta tuma lugá na Boneiru loke ta di aploudí inmensamente, i e tin un durashon di 2 aña.

Radio Live 99.9 FM a papia ku Miluska Hansen, bosero di KPCN i el a splika ku no ta bèrdat ku tabatin 300 persona di Kòrsou a solisitá pa bira polis. E interes ta haltu si pa hende ku ta deseá pa bira polis. KPCN mes ta trahando riba un komunikado ofisial pa desmentí e informe ku a sali den un matutino na Kòrsou. Manera tin e informashon ofisial, ta informá komunidat di esaki, Hansen a bisa. Tambe el a menshoná ku na Boneiru Saba i Sint Eustatius a organisá un ‘boothcamp’ i esaki a resultá un éksito total. Hansen: ”Esaki nos a hasié pa asina e hende di kada isla por solisitá pa bira polis, komo ku nan konosé e kultura di e isla mas mihó ku un otro. Esei no ta kita ku un otro no por hasi e tarea di un polis na un isla ku e no konosé. E ‘boothcamp’ ta apart for di e parti di solisitá i tabata pa sera konosí di aserka ku e kuerpo i tin un bista kiko ta e trabou di polis. A hasi esaki pa kita e drèmpel loke a duna resultado hopi positivo. Tin hende ku no a solisitá promé i despues di e ‘boothcamp a solisitá. Na Boneiru tabatin mas o ménos 60 inskripshon pero 34 persona tabata presente. Lamentablemente esnan ku a yega lat i for di e orario palabrá, a wòrdu mandá kas komo ku trabou di polis sigur ta eksiguí disiplina.

Share This
error: Content is protected !!