KRALENDIJK – S.V. ATC di Tera Kòrá tin un direktiva nobo bou di presidensia di sr. Aaron Martis. Esaki e presidente saliente sr. Frensel “Dicky” Janga, a informá direktiva di FFB den karta siman pasá.
Pa medio di un mail sr. Frensel Janga, presidente salienté di S.V. ATC, ta pidi direktiva di FFB atenshon pa lo siguiente: Djárason 15 Juli 2020 último, S.V. ATC a eligí un direktiva nobo. Di e direktiva anterior / promé, tur e nuebe (9) miembronan a tuma nan retiru.
Komo Presidente a eligí Sr. Igramoth Aaron Sithri Martis mihó konosí komo Aaron.


Huntu ku Aaron tin seis otro miembro mas ku ta forma e direktiva nobo di S.V. ATC ku asina ta totalisá un direktiva nobo di shete (7) miembro.
E seis otro miembronan ta Komisario Sr. Jonathan Makaai, Tesorero e hóben Gioïellison Antonia, Segundo Tesorero Sr. Carol Winklaar, Sekretaria Rayan Rammo, Segundo Sekretario Sr. Eugène Abdul, i Vise Presidente Sra. Jean Anne “Polly” Winklaar. Presidente saliente Sr. Frensel “Dicky” Janga ta keda komo konsehero. Direktor Tekniko di e ekipo ta Sr. Rudsel Sint Jago.
Ku eksepshon di Sra. Polly Winklaar, tur e otro personanan ta miembronan nobo ku a drenta e Direktiva di S.V. ATC.


Komo presidente saliente sr. Janga ta hasi uso di e oportunidat pa gradisí direktiva di FFB pa tur e añanan komo direktiva saliente di S.V. ATC, a traha huntu ku direktiva di FFB na bienestar di fútból Boneriano.
Tambe e ta deseá e direktiva nobo di S.V. ATC tur klase di éksito ku nan funshon i karera nobo i ta konta ku direktiva di FFB lo duna nan tur e koperashon nesesario pa asina nan por ehekutá nan funshon na satisfakshon. Finalmente sr. Janga ta bisa ku e ta spera di a informá direktiva di FFB sufisientemente i ta terminá ku un saludo kòrdial.

Share This
error: Content is protected !!