KRALENDIJK – PlataForma Rincon a wòrdu kreá pa huntu ku “Integrale Wijk Aanpak” bai traha ku organisashonnan di Rincon pa adelanto i desaroyo di e bario. E plataForma tin un trahadó speshal designá pa kordiná trabounan entre e plataForma i e servisio. PlataForma Rincon tin e enkargo pa registrá tur organisashon deportivo, kultural i sosial ku ta traha ku mucha, hóben i hende grandi. Pesei ta pidi pa pasa inskribí bo organisashon durante un feria ku ta bai tin djasabra awó. Esaki pa “Integrale Wijk Aanpak” por tin un bista kuantu organisashon tin den e bario. Asina por duna mas i mihó atenshon ora di duna ayudo i sosten.

Den e kuadro aki PlataForma Rincon ta organisá un grandioso feria djasabra 25 di yüli próksimo den kurá di Cocari i den kaya pariba di Cocari. Kaya Rincon lo ta será for di parada di bùs te na Rose Inn. Lema di e feria ta: kontagiá mi ku bo energia positivo. E feria ta kuminsá 3’or di atardi te 12’or di anochi. Den e feria lo bai tin diferente stènt i weganan atraktivo pa mucha i hende grandi. Bar i kushina lo ta bon surtí.

Durante di e feria ta bai tin dos parada den kayanan di Rincon. E promé ta un parada folklóriko uniformá ku diferente grupo ku ta sali 5’or di atardi pariba di misa i ta dura te 7’or anochi. Promé ku e parada sali pa 4:30 di atardi, lo tin un homenahe na Ettienne Coffy, un konosido shofùr di trèker den tur parada aki na Boneiru kende a fayesé trágikamente siman pasá. Despues ta bai tin apertura ofisial ku introdukshon di PlataForma Rincon, diskursonan i entrega di plakat.

Pa 8’or ta ranka sali un simadan ku animashon di un grupo musikal krioyo. Tur dos parada ta kuminsá pariba di misa bai pabou den kaya Rincon te na Pòmp di gasolin, drenta kaya Commerce, kaya E. B. Sint Jago te na misa, kaya C. D. Crestian, Kaya Commerce, kaya Rincon i tèrminá pariba di Cocari. Animashon musikal ta na enkargo di DJ, FMK, Foyan Boys, Timon Krioyo i JC & Friends.

PlataForma Rincon ta invitá pueblo di Boneiru kompleto pa bin disfrutá di e dushi ambiente di Rincon i lòs e pianan den e paradanan despues di a sinta ketu varios luna pa motibu di Covid19.

Share This
error: Content is protected !!